Përpara se të vriste dy turistët çekë në muajin korrik në Malësinë e Dukagjinit, Sokol Mjacaj ishte një personazh i cili kishte kaluar edhe më herët në dyert e drejtësisë, po me akuzën e vrasjes dhe të vjedhjes, por nuk e kishte vuajtur të plotë dënimin në asnjërën prej ngjarjeve ku ishte i akuzuar.
Në vitin 2010, Mjacaj ishte arrestuar nga Policia e Shkodrës për vrasjen në bashkëpunim të 13-vjeçarit Agim Lera. Gjykata e Shkallës së Parë Shkodër i dha vendimin me 10 vite heqje lirie. Por, ishte Gjykata e Apelit Shkodër, ajo që përmbysi vendimin e Shkallës së Parë, duke e dënuar Mjacajn vetëm me 4 heqje lirie, por kësaj radhe jo për vrasje, por për moskallëzim krimi.
Ky vendim, më pas u la në fuqi edhe nga Gjykata e Lartë, e cila i hapi “dritën jeshile” Sokol Mjacajt për t’iu drejtuar lirisë. Precedenti i dytë po me Sokol Mjacaj është në dhjetor 2014, kur Mjacaj u akuzua për vjedhje. Prokuroria kërkoi dy vjet heqje lirie për të akuzuarin, i cili u dënua me 1.6 vjet burg. Por edhe këtu Mjacaj nuk e përfundoi të plotë dënimin.
Ajo që ka surprizuar mbrëmë në “Opinion” ështe fakti që njëri nga gjykatësit që ka ndikuar në lirimin e shpejtë të Sokol Mjacajt, i cili vetëm pak kohë më pas do të ekzekutonte dy turistë çek, është gjykatës në Kolegjin Zgjedhor dhe si i tillë në bazë të Kushtetutës së Republikës së Shqipërisë, ky gjyqtar gëzon imunitetin për të mos u investiguar për vendimet që jep.
