Vetingu në polici ka vijuar ditën e sotme me Drejtorin e Përgjithshëm të Shërbimit për Çështjet e Brendshme të Ankesave (SHÇBA) në Policinë e Shtetit, Muhamet Rrumbullaku, i cili duhet të jepte sqarim për një çështje që kompromentonte figurën e tij.
Në Komisionin e Jashtëm të Vlerësimit ai foli për çështjen e fotografisë të disa viteve më parë ku ai duket duke drekuar me disa kolegë dhe Arben Frrokun.
Në vitin 2013 deputeti socialist Saimir Tahiri publikoi disa foto që tregojnë Rrumbullakun së bashku me kolegët e tij Agron Kuliçaj, Tonin Vocaj e Nikol Bala në një drekë bashkë me Arben Frrokun, ky i akuzuar asokohe për vrasjen e komisarit Dritan Lamaj.
Përmes fotove në fjalë, Partia Socialiste, atëherë në opozitë, akuzoi qeverinë se “kupola drejtuese e policisë ka pasur kontakte dhe ka ndihmuar në largimin e Frrokut nga vendi”.
Në sqarimin e tij Rrumbullaku tha se fotot janë bërë në vitin 2011 dhe se takimi ka qenë rastësor pas shërbimit me kolegët e tij. Frroku thuhet se i është bashkuar tavolinës më vonë. Ndërkohë që vrasja e Lamajt ka ndodhur më 25 shkurt 2013.
Argumentet e Rrumbullakut kanë bindur komisionin e vlerësimit. Duke marrë të dhëna nga prokuroria dhe policia, të dhëna të cilat kanë nxjerrë përfundimin se pretendimet e Rrumbullakut qëndrojnë, pra se “takimi ka qenë rastësor” dhe se deri më sot “nuk ka asnjë dokument tjetër që vërteton të kundërtën” se “Rrumbullaku ka pasur njohje dhe kontakte me Frrokun”.
Në dy kriteret e tjera, atë të pasurisë dhe përgatitjes profesionale ai rezultoi në rregull dhe kjo mund të bëjë që ai ta kalojë vetingun.
Kur ministër i Brendshëm u bë Saimir Tahiri, Rrumbullaku, Vocaj dhe Kuliçaj u shkarkuan nga detyra. Mirëpo në fillim të vitit 2019, ministri aktual Sandër Lleshaj, e riktheu Rrumbullakun në detyrë si drejtues i SHÇBA.
Në vitin 2015, Arben Frroku u shpall i pafajshëm nga Gjykata e Krimeve të Rënda dhe u largua nga vendi por çështja për vrasjen e komisarit Dritan Lamaj u apelua dhe Frroku u dënua në mungesë me burg përjetë.
Një vit më vonë ai u arrestua në Holandë dhe prej asaj kohe ai mundi të nisë një proces gjyqësor paralel, me pretendimin se kishte marrë dënim “në shkelje të të drejtave të njeriut”.
Me këtë pretendim ai mundi të rrëzojë kërkesat për ekstradim nga autoritetet shqiptare dhe në janar të këtij viti, drejtësia holandeze e dënoi vetëm 18 vite burg, dënim të cilin Frroku e ri-apeloi. /Opinion.al
