Komiteti Ekzekutiv i UEFA-s, i mbledhur sot në Nion të Zvicrës, ka miratuar formatin e ri të garave europiane për sezonet 2018-2021.
Përveçse vendosi që finalja e Ligës së Kampionëve 2018 të luhet në Kiev kurse e Ligës së Europës në Lion, organi më i lartë i “qeverisë” europiane të futbollit miratoi zyrtarisht edhe hollësitë e skuadrave pjesëmarrëse, koeficientët për klubet, shpërndarjen e të ardhurave dhe oraret e ndeshjeve.
Këto vendime janë një lajm i mirë veçanërisht për Italinë, që, së bashku me Spanjën, Anglinë dhe Gjermaninë (kampionatet me koeficientin më të lartë), do të ketë sërish katër skuadra në grupet e Ligës së Kampioneve, raporton panoramaSport.
Po ashtu, fituesi i Ligës së Europës, sezonin pasardhës do të luajë direkt në grupet e Championsit, dhe jo në fazat paraeliminatore siç ka qenë deri tani.
UEFA ka vendosur të ndryshojë edhe mënyrën e llogaritjes së koeficientëve të klubeve si dhe shpërndarjen e të ardhurave. Ky është një lajm i mirë edhe për Shqipërinë, pasi shpërblimet për ekipet pjesëmarrëse në Ligën e Kampioneve dhe në Ligën e Europës do të rriten ndjeshëm.
Një ndryshim tjetër i rëndësishëm ka të bëjë me oraret e ndeshjeve të Champions-it, duke iu përshtatur formatit të Ligës së Europës. Kështu, duke filluar nga sezoni 2018-2019, dy ndeshje të grupeve do të luhen në orën 19:00 dhe gjashtë të tjerat në 21:00.
