Avokati mbrojtës i ish-administratorit të “Bankers petroleum”, Leonidha Çobos ka dalë me një deklaratë me shkrim lidhur me akuzat ndaj klientit të tij.
Në reagimin e tij, avokati i Çobos, ka deklaruar se ai e ka kryer detyrën në mënyrë korrekte nga viti 2010-2015.
Avokati ka deklaruar se periudha e hetuar nga Prokuroria e Fierit, i referohet viteve 2018 e në vijim, kur Çobo nuk ka më pasur asnjë funksion në kompani, ndërsa raportet mbi të cilat janë ngritur akuzat janë të pas 2018-ës.
Në deklaratën e tij thekson se marrëdhënia kontraktuale e Bankers me shtetin shqiptar është e rregulluar me Marrëveshjen e Hidrokarbureve të vitin 2004ku është përcakuar detyrimi i Bankers për kryerjen e investimeve në zhvillimin e aktivitetit.
Mbrojtja ka theksuar se çdo pretendim lidhur me investimet e realizuara nga Bankers për periudhën 2010-2015, kur Çobo ka qenë administrator, janë audituar dhe verifikuar nga AKBN dhe Drejtoria e Tatimeve, për të cilat ka edhe disa vendime gjyqësore dhe të Gjykatës së Arbitrazhit në Paris, që konfirmojnë rregullshmërinë e aktivitetit për këtë periudhë.
“Z. Cobo, ka mbi 10 vjet që nuk është më në administrim të Bankers dhe vendosja e tij në masën ekstreme të paraburgimit për pretedime të pabazuara apo të hetuara më parë, pa u thirrur dhe pyetur asnjëherë nga prokuroria, është jo vetëm e pabazuar ligjërisht, por në shkelje të hapur të një procesi të rregullt ligjor”, theksohet ndër të tjera në deklaratë.
Deklarata e plotë e avokatit mbrojtës:
Z. Leonidha Cobo ka qënë administrator i Bankers për periudhën 2010-2015 dhe e ka kryer detyrën e tij në mënyrën me korrekte të mundshme.
Periudha kohore e hetuar nga prokuroria dhe cdo pretendim, bazohet në raport kontrollet e viteve 2018 e në vijim.
Marrëdhënia e Bankers në shtetin shqiptar, kompaninë Albpetrol sh.a, është e rregulluar me Marrëveshjen e Hidrokarbureve të vitin 2004, ku është përcakuar detyrimi i Bankers për kryerjen e investimeve në zhvillimin e aktivitetit.
Cdo pretendim lidhur me investimet e realizuara nga Bankers për periudhën 2010-2015, kur z. Cobo ka qenë administrator, janë audituar dhe verifikuar nga AKBN dhe Drejtoria e Tatimeve, për të cilat ka edhe disa vendime gjyqesore dhe të Gjykatës së Arbitrazhit në Paris, që konfirmojnë rregullshmërinë e aktivitetit për këtë periudhë.
Po kështu, z. Cobo është hetuar në vitin 2020-2021 nga Prokuroria Fier për veprimet e administrimit të kompanisë Bankers, procedim i rregjistruar mbi bazën e kallëzimet penal të vet Bankers, pas ndryshimit të pronësisë në vitin 2018, për shpërdorim të kompetencave të administratorit, vjedhje duke shpërdoruar detyrën, korrupsion në sektorin privat, etj, duke kërkuar në përfundim të hetimeve pushimin e procedimit.
Kërkesa e prokurorisë është pranuar nga Gjykata e Shkallës së Parë Fier dhe është lënë në fuqi nga Gjykata e Apelit dhe nga Kolegji Penal i Gjykatës së Lartë.
Ky procedim penal mban nr. 966/2020 dhe ndodhet në arkivën e prokurorisë, por nuk është përmendur në asnjë moment të këtij hetimi.
Prokuroria ka pretenduar se Bankers me dashje ka nxjerë bilancet e aktivitetit të saj me humbje, fakt jo i vërtete, të paktën për periudhën 2010-2015, pasi bilancet kontabile të Bankers janë pozitive dhe me të ardhura të konsiderueshme, të cilat janë riinvestuar në funksion të zhvillimit të aktivitetit dhe rritjes së vlerës së aseteve të Bankers.
Pra, kemi të bëjmë me dy bilance të ndryshme, bilanci kontabël i shoqërisë dhe bilanci fiskal që lidhet me deklarimin e fitimit nga të ardhurat, nqs kompania nuk do të kishte investuar të ardhurat.
Shoqëria Bankers ndër vite ka investuar disa miliardë euro në ekonominë shqiptare, duke kontribuar drejtpërdrejt me rreth 750 milionë euro rente të paguar, qindra miliona euro të tjera në taksa dhe tatime të paguara nga shërbimet e shoqerive të nënkontraktuara, dhjetëra milion euro taksa lokale dhe investime në komunitetet lokale, si dhe mijëra persona të punësuar.
Z. Cobo, ka mbi 10 vjet që nuk është më në administrim të Bankers dhe vendosja e tij në masën ekstreme të paraburgimit për pretedime të pabazuara apo të hetuara më parë, pa u thirrur dhe pyetur asnjëherë nga prokuroria, është jo vetëm e pabazuar ligjërisht, por në shkelje të hapur të një procesi të rregullt ligjor./tvklan
