Ambasadorja e SHBA-ve Yuri Kim ka takuar kryetaren e Kuvendit Lindita Nikolla, në Kryesinë e Kuvendit.
Mësohet se pak orë pasi u miratua qeveria e re, Yuri Kim diskutoi për rreth 30 minuta me kryeparlamentaren e re.
Në një reagim në Twitter, Kim shkruan: “Kënaqësi të uroja Lindita Nikollën për zgjedhjen e saj si Kryeparlamentare. Më bëhet qejfi të shoh parlamentin e rikthyer me fuqi të plotë, opozitën prezente dhe duke ngritur zërin. Respekti për pikëpamjet e ndryshme, debatin civil dhe bashkëpunimin aty kur është i mundur janë thelbësore për demokracinë dhe besueshmërinë përpara votuesve”.
Takimi mes Kim dhe Nikollës vjen pas seancës plenare e cila nis dje në orën 10:00 dhe përfundoi mëngjesin e sotëm, ku edhe u votua qeveria e re “Rama 3”. Bëjmë me dije se ky është takimi i parë i ambasadores me kryetaren e re të Kuvendit, pasi parlamenti i ri ka nisur punimet.
