27-vjeçari shqiptar Edison Pula, është një nga tre të burgosurit që prenë hekurat e qelisë dhe u arratisën nga burgu i Trevisos në Itali.
Tre të burgosurit me origjinë shqiptare janë arratisur nga burgu në Itali rreth orës 5 të mëngjesit. E ngjashme më një skenë filmi ata prenë hekurat e qelisë dhe zbritën poshtë me çarçafë. Dy prej tyre u kapën menjëherë nga policia e burgjeve, ndërsa 27-vjeçari Edison Pula arriti t’i shpëtojë policisë italiane.
Pula është arrestuar në Shkurtin e vitit të kaluar si pjesë e një bande grabitësish. Përveç akuzave të grabitjes, ai akuzohet edhe për vrasje të mbetura në tentativë, posedim i lëndëve plasëse dhe trafik droge, vepra penale që i ka kryer jashte Italisë.
Por, Edison Pula është një emër i njohur për policinë edhe në Shqipëri. Në vitin 2016, ai ishte arratisur edhe nga Komisariati i Krujës duke kapërcyer murin rrethues. Ai ishte arrestuar si pjesë e bandës së Niklës me aktivitet kriminal në fushën e krimeve kundër personit, pronës dhe prodhimit e shitjes së trafikimit të lëndëve narkotike./Opinion.al
