Kreu i grupit socialist, Taulant Balla bëri me dije se çështja e Gjykatës Kushtetuese do të shkojë në Komisionin e Venecias. Balla u shpreh besimplotë se Venecia do të japë opinione objektive lidhur me këtë çështje.
“Sikurse është vepruar nga ana e Komisionit Hetimor Parlamentar në rastin e aktit antikushtetues të Presidentit për ç’dekretimin e datës së zgjedhjeve të 30 Qershorit, që Kryetari i Kuvendit në emër të Kuvendit të Shqipërisë t’i drejtohet Komisionit të Venecias. Një institucion i gjithëpranuar, jo vetëm në Shqipëri, por kudo në Europë e më gjerë, për cilësinë e opinioneve të veta. Kujtojmë këtu që opinioni i Komisionit të Venecias për çështjen e ç’dekretimit të zgjedhjeve ka qenë i plotë, ka qenë i qartë dhe në këtë këndvështrim, është e domosdoshme që edhe në këtë rast Komisioni Hetimor t’i drejtohet kryetarit të Kuvendit, që sapo të jetë miratuar nga Kuvendi zgjerimi i objektit të hetimit dhe të marrë kohën e nevojshme komisioni, duke zgjatur edhe afatin e punës së Komisionit, t’i drejtohemi menjëherë Komisionit të Venecias me qëllim që ky institucion i gjithëpranuar për opinionet objektive, të japë vlerësimin e vet.”, tha Balla.
Ky lajm vjen pasi Ambasada e SHBA reagoi në lidhje me situatën e krijuar për ringritjen e Gjykatës Kushtetuese, dhe ftoi palët ta çojnë çështjen në Komisionin e Venecias në mungesë të një institucioni që do të mund të vendoste mbi interpretimet e palëve.
“Institucionet gjyqësore shqiptare, kushtetuta dhe ligjet për zbatimin e reformës në drejtësi, duhet të udhëheqin procesin e zgjidhjes së këtyre interpretimeve të debatuara. Në mungesë të një institucioni të përshtatshëm ligjor, i cili mund të vendoste mbi interpretimet e kundërta, Shtetet e Bashkuara mbështesin çuarjen e çështjes në Komisionin e Venecias, si një palë e tretë kompetente dhe e paanshme, për opinionin e tij ligjor. Gjithashtu, nxisim palët kundërshtuese që të respektojnë opinionin ligjor të Komisionit të Venecias”, shkruante ambasada./Opinion.al
