Bashkimi Evropian ende nuk është e kënaqur me hapat që ka marrë Kosova drejt depërshkallëzimit në veri, për këtë arsye masat për Kosovën mbesin ende në fuqi.
Në një konferencë për media zëdhënësi i BE, Peter Stano tha se të dyja palët duhet t’i kthehen dialogut dhe se nuk ka rrugë tjetër.
Ai ka theksuar se Bashkimi Evropian pret bashkëpunim të plotë dhe të pakushtëzuar nga Beogradi për të zbardhur ngjarjen e ndodhur në Banjskë më 24 shtator.
“Masat e prezantuara për Kosovën ishin reagim direkt ndaj eskalimit që pati, apo mungesës së deeskalimit që kemi parë më herët, nuk po flas për 24 shtatorin, po flas për periudhë para kësaj. Shtetet anëtare ende nuk kanë parë hapa të mjaftueshëm nga Kosova për deeskalim kuptimplotë, për këtë arsye masat janë ende në fuqi. Sa i përket dialogut, nuk ka asnjë rrugë tjetër, pos kthimit në dialog. Rruga drejt BE-së për Kosovën e Serbinë shkon pashmangshëm nëpërmjet dialogut të ndërmjetësuar nga BE-ja, s’ka rrugë tjetër”, ka thënë Stano.
Sa i përket hetimit për sulmin në Banjskë, Stano ka deklaruar se po presin rezultatin përfundimtar të hetimeve.
“Presim rezultatin përfundimtar të hetimit të plotë. Kur të përfundohen hetimet, e BE-ja të ketë rezultatet, e të ketë pamje të qartë se çfarë ka ndodhur dhe kush qëndron prapa kësaj, atëherë shtetet anëtare do të vendosin për hapa tjerë”, njoftoi ai./Opinion.al
