Tensionet që ka sjellë kriza politike në Shqipëri ka sjellë për pasojë jo pak episode përplasjesh mes protestuesve të opozitës dhe forcave të policisë. Publikimi i përgjimeve nga gazeta ‘Bild’ dhe konflikti institucional mes presidentit dhe qeverisë nuk kanë shërbyer për të ulur palët në dialog por e kanë polarizuar akoma më shumë situatën. Madje nuk kanë qenë të pakët zërat në media se kjo rrjedhë ngjarjesh mund të sjellë një situatë të ngjashme më ato të vitit 97’.
I pyetur në lidhje me këtë skenar në një emision televiziv, ish deputeti i Partisë Demokratike, Ervin Salianji tha se megjithëse nuk do ta donte këtë gjë, mos reagimi i qeverisë e ka bërë Shqipërinë një fuçi baruti që po i vendoset “një fuçi baruti së cilës po i vendoset flaka për pushtet personal”.
“Unë nuk do të doja kurrë, por kur shikoj që edhe pas këtyre përgjimeve nuk ka asnjë reagim, edhe vetë nuk e di nëse do ta përmbaja dot veten në një studio televizive përballë maskarenjsh të cilët e trajtojnë Shqipërinë si plaçkë. Në këtë kuptim, kur nuk ka zgjidhje tjetër, është risk i madh dhe Shqipëria sot është një fuçi baruti së cilës i vendoset flaka afër për pushtet personal” tha Salianji.
Ai shtoi gjithashtu se Partia Demokratike nuk ka bashkëpunuar me bandat për të marrë pushtetin. Kjo situatë sipas tij e bën të pamundur që PD të kontrollojë mijëra qytetarë që protestojnë kundër qeverisë dhe zgjedhjeve pa kundërshtar. Kështu që e vetmja zgjidhje është tërheqja e Kryeministrit duke dhënë dorëheqjen.
“Edhe Partia Demokratike ka pasur oferta nga bandat, por ne nuk e kemi bërë këtë zgjedhje dhe nuk do ta bëjmë. Po të përgatisnim edhe ne bandat tona, ku do të shkonte Shqipëria. Nuk kemi punë fare me qytetarët, por nuk kontrollojmë dot mijëra qytetarë që përballen me qeverinë. Edi Rama duhet të tërhiqet dhe t’i hapë rrugë zgjidhjes politike” u shpreh Salianji. /Opinion.al
