Siguria e aeroportit, çfarë deklaronte drejtori i Aviacionit Civil

A ka dështuar kompania koncesionare ICTS Albania në lidhje me grabitjen e Rinasit. Akuzat e qeverisë janë në drejtim të kopanisë.

Por çfarë ka dhënë drejtori i Aviacionit Civil Shqiptar, Krislen Keri disa muaj më parë për kompaninë ICTS Albania që merret me sigurinë brenda aeroportit.

Grabitësit e aeroportit të Rinasit kanë pasur informacion të detajuar për transportin e parave.

Ata dinin saktësisht oraret se kur blindat me para do të mbërrinin në aeroport, ku shumat monetare të tre bankave në Shqipëri do të transportoheshin drejt Austrisë.

Pjesë nga deklarata
Siç mund të jeni në dijeni, sistemi i sigurisë̈ së aviacionit civil në Shqipëri u godit rëndë në ngjarjen e datës 30 qershor 2016, kur një grup i armatosur arriti të hyjë me automjet në pistë dhe të grabis nën kërcënimin e armëve një sasi të konsiderueshme valute dhe të largohet pa u dëmtuar. Të tjera ngjarje dhe incidente të sigurisë̈ që janë evidentuar kohë pas kohe (2017-2018) dhe që janë bërë objekt i hetimeve të sigurisë nga ana e AAC, kanë të bëjnë me depërtimin e paautorizuar të disa personave në rrethimin e aeroportit, apo pasagjerë problematik të cilët shpesh kanë rrefuzuar direktivat e agjentëve të sigurisë në Rinas për ndjekjen e procedurave të duhura të skanimit dhe kalimit të kontrolleve të sigurisë.

Një nga problemet kryesore që evidentohet letshëm në këto 14 vjet manaxhim të aeroportit, është mungesa thuajse e dukshme tashmë e plotësimit të të gjithë komponentëve të sistemit të manaxhimit të aviacionit dhe këtu e kam fjalën jo vetëm për punën në letra, të raporteve të auditeve dhe mbylljen e gjetjeve të tyre, por shkuarja deri në fund e arsyeve të dështimit në disa raste të sistemit të sigurisë. Në masat e marra nga ne si autoritet mbikqyrës, nuk ka pasur ndonjëherë përshkallëzim të masave me gjobë apo revokim të autorizimeve apo certifikatave të dhëna për personelin e sigurisë, e jo më diskutime për masa më të rënda, si pjesë e mekanizmave përmirësues të sistemit dhe jo me qëllim parësor penalizimin.

Periudha e punëve vetëm me raporte gjetjesh dhe mbyllje gjetjesh, të ngelura vetëm në letra, përgjatë këtij viti ka marrë fund, ku në mirëkuptim me palët është përmirësuar sistemi i mbikëqyrjes dhe marrjes së masave, në të mirë të përmirësimit dhe ruajtjes së standardit të vendosur nga ana e operatorit. Për Autoritetin e Aviacionit Civil është e papranueshme dhe e pakuptueshme tejkalimi i çdo afati të arsyeshëm për organizimin e një ushtrim sigurie apo edhe finalizimin e ri-firmosjes së marrëveshjes së bashkëpunimit me policinë e shtetit.

Duke e vlerësuar për një ndjeshmëri të lartë të publikut, AAC është e angazhuar dhe insiston, që të punohet sistematikisht dhe në mënyrë gjithëpërfshirëse, jo vetëm ndërmjet subjekteve që kanë përgjegjësi direkte për zbatimin e masave të sigurisë së aviacionit, sipas përcaktimeve të Programit Kombëtar të Sigurisë së Aviacionit, por edhe nga subjektet e tjera që janë të lidhura në mënyrë indirekte për veprimtaritë që kryhen në aeroport.

Ka ardhur koha e veprimeve konkrete dhe metodologjia e përdorur duhet të jetë vetëm ajo e analizës së rrënjëve të problemeve (root cause analysis), pa limite dhe kufizime për veprimet e duhura për përmirësimin definitiv të sistemit tonë të sigurisë në aviacion. Të mirëpritura janë fondet e harxhuara për trajnimit e personelit të sigurisë së aviacionit civil (përfshirë dhe ato të ICTS Albania) dhe rritjes së pagave dhe përdorimi i stimujve për më të mirët. Të mirëpritura janë

edhe investimet për përmirësimin e masave dhe procedurave, standardeve operacionale, apo ato për blerjen e pajisjeve të sigurisë. Autoriteti i Aviacionit Civil mirëpret iniciativat për analizimin në detaj të faktorëve që mund të ndikojnë në ruajtjen e standardit të duhur të punës në këtë fushë kritike, përfshi këtu analizën e faktorëve të të ardhurave dhe shpenzimeve për sigurinë̈, një çështje midis Aeroportit dhe ICTS, dhe jemi të gatshëm të jemi ndërmjetës të kaësaj tryeze diskutimesh./Opinion.al