Nga vajzat seksualisht të shfrytëzuara në Etiopi tek punëtorët emigrantë në Malajzi dhe Mauritius, Britania premtoi 4 milionë paund për të mbështetur projektet globale kundër skllavërisë.
Gjashtë organizata, mes tyre organizata bamirëse ndërkombëtare Kundër-Skllavërisë dhe Universiteti i Kombeve të Bashkuara, një institucion kërkimor, do të ndajnë paratë e ndihmës dhënë nga Fondi për Inovacionin e Skllavërisë Moderne.
Sipas Ministrisë së Brendshme të Britanisë, financimi do të përdoret gjithashtu për të organizuar seminare për skllavërinë moderne në Afrikën e Jugut, për të përmirësuar mbështetjen për të mbijetuarit në Indi dhe për të zhvilluar një qendër informacioni në internet për të rritur politikat kundër skllavërisë.
“Trafikimi i qenieve njerëzore, puna e detyruar dhe shfrytëzimi, fatkeqësisht nuk janë të këqija të shkuara, por janë mes nesh dhe sot. Projektet që financohen do të ndihmojnë në mbrojtjen e disa prej njerëzve më vulnerabël në planet dhe do të inkurajojnë qasje më të reja për identifikimin e viktimave dhe ndjekjen e atyre që do t’i shfrytëzonin ato”, tha Victoria Inkins, ministria e Britanisë për krimin.
Fondi për Inovacionin e Skllavërisë Moderne u njoftua që në vitin 2016 dhe më parë ka dhënë 6 milionë paund për skema të tilla si fushata ndërgjegjësimi në Nigeri, Filipine dhe Vietnam.
Iniciativa Tregtare Etike (ETI), një koalicion i sindikatave, firmave dhe organizatave bamirëse që promovojnë të drejtat e punëtorëve dhe një nga përfituesit e fondeve më të fundit, tha se do të ndihmonte në informimin e punëtorëve migrantë në Malajzi për të drejtat e tyre dhe rehabilitimin.
“ETI gjithashtu do të punojë me bizneset në mbarë botën në mënyrë që ata të jenë në gjendje të përmirësojnë kushtet e punës për punëtorët emigrantë dhe të ofrojnë kujdes mjekësor për punëtorët ku ata kanë vuajtur nga abuzimin”, tha Oëain Johnstone i ETI.
Qeveria britanike ka financuar gjithsej 200 milionë paund për të luftuar skllavërinë moderne jashtë shtetit dhe ka dhënë miliona paund për disa kombe duke filluar nga Shqipëria deri tek Vietnami.
Britania e ka quajtur veten si një lider në përpjekjet globale për t’i dhënë fund skllavërisë dhe ka miratuar Aktin e Skllavërisë Moderne në vitin 2015 për të goditur trafikantët, për të detyruar bizneset të kontrollojnë masat për punën e detyruar si dhe për të mbrojtur njerëzit në rrezik të skllavërimit modern.
Rreth 40 milionë njerëz në mbarë botën jetojnë si skllevër, të bllokuar në punë ose martesa të detyruara, sipas një studimi të rëndësishëm nga grupi i të drejtave Australiane “Walk Free Foundation” dhe “Organizata Ndërkombëtare e Punës” e SHBA-së./Opinion.al
