Zbardhen autorësia dhe rrethanat e ngjarjes së ndodhur dy ditë më parë, në lagjen “Besëlidhja”, ku u shkatërrua me eksploziv, automjeti i një punonjësi policie. Policia ka arrestuar autorin e dyshuar të krimit, Fatjon Rrika, i cili rezulton një shtetas me precedent në Itali, për vjedhje me armë. Ai u kap duke lëvizur me çiklomotorin me të cilin kishte shkuar për të kryer shpërthimin.
Sulmi ndaj policit dyshohet se ka ndodhur për shkak të detyrës. I arrestuari dhe bashkëpunëtori i tij që vendosën tritolin në mjet dyshohet se janë të paguar dhe porositur nga palë të tjera për të kryer sulmin ndaj policit.
“Si rezultat i veprimeve hetimore intensive të kryera me qëllim përcaktimin e autorësisë dhe sqarimin e rrethanave të ngjarjes së ndodhur më datë 15 mars 2026, në lagjen “Besëlidhja”, ku u shkatërrua me lëndë plasëse, automjeti i punonjësit të Policisë, shtetasit Gj. Gj., shërbimet e Komisariatit të Policisë Lezhë, në drejtimin e Prokurorisë dhe në bashkëpunim me shërbimet e Komisariatit të Policisë Kurbin, finalizuan operacionin e koduar “Zoomed In”. Gjatë operacionit, u identifikua si rezultat i vëzhgimit të hollësishëm të një sërë pamjesh filmike të siguruara në akse të ndryshme, autori i dyshuar i rastit, shtetasi F. Rr., 32 vjeç”, thuhet në njoftimin e policisë.
“32-vjeçari u arrestua në fshatin Zhejë, Kurbin, teksa drejtonte të njëjtin çiklomotorin, me të cilin dyshohet se kishte shkuar në vendngjarje, ditën e kryerjes së krimit. Në vijim të operacionit, nisi procedimi penal për babanë e shtetasit F. Rr., shtetasin N. Rr., 66 vjeç, pasi gjatë kontrollit në banesën e tyre, u gjet një armë gjahu, e cila posedohej pa leje. Çiklomotori dhe arma e gjahut u sekuestruan me cilësinë e provës materiale. Vijon hetimi në drejtimin e Prokurorisë së Lezhës, për të identifikuar dhe nxjerrë përpara penale, një shtetas që dyshohet se ka bashkëpunuar me 32-vjeçarin, për kryerjen e këtij krimi”, vijon njoftimi.
Materialet procedurale iu referuan Prokurorisë së Lezhës, për veprime të mëtejshme.
