Bashkia e Tiranës ka shpallur fituesin e tenderit për studimin dhe projektimin e godinës së re të Teatrit Kombëtar.
Për këtë tender u paraqitën vetëm 2 oferta, mes të cilave u shpall fituese ajo e bashkimit të kompanive ‘A & E Enginnering’ dhe ‘FM Ingengeria SPA’.
Oferta e tyre ka qenë vetëm 13 mijë lekë nën fondin limit të vendosur nga Bashkia e Tiranës.
Operatorët për bërjen e projektit ofruan 60 milionë e 300 mijë lekë (603 milionë lekë të vjetra), kurse fondi limit i përcaktuar nga qeveria ishte 60 milionë e 317 mijë lekë. Ndërsa bashkimi operatorëve ekonomik që nuk fituan kishin ofruar për projektin 55 milionë e 635 mijë lekë, por është vlerësuar me më pak pikë nga komisioni i vlerësimit të ofertave.
Fituesit e tenderit kanë afat 30 ditë të paraqesin sigurimin e kontratës. Ata parashikohet të bëjnë detajimet teknike mbi projekt idenë e arkitektit danez, Bjarke Ingels.
Ende nuk ka një vendim lidhur me fillimin e punimeve për ndërtimin e godinës së Teatrit Kombëtar. Kujtojmë se godina e vjetër u shemb më 17 maj të këtij viti, mes protestave dhe kundërshtive nga ana e Aleancës për Mbrojtjen e Teatrit, opozitës dhe shoqërisë civile.
Aleanca ka bërë kallëzim në SPAK për këtë çështje, si për procedurat që çuan në prishjen e godinës ashtu edhe për aksionin e prishjes. Akuza e tyre është se fadroma nisi shembjen e godinës teksa disa prej tyre ishin ende brenda Teatrit, duke e konsideruar këtë gjë tentativë vrasjeje./ Opinion.al
