Një 24-vjeçar ka rënë në prangat e policisë, pasi vetëm një ditë më parë kishte denoncuar plagosjen e tij.
Isak Mehmedaj nga fshati Mushan i Shkodrës tha para grupit hetimor se kishte qenë duke hedhur mbeturinat, kur është qëlluar me armë nga një distancë e largët. Ai është shprehur se nuk e dinte kush mund ta ketë qëlluar pasi nuk ka mundur ta shohë autorin.
Pas hetimeve të disa orëve të Policisë së Shkodrës është zbardhur se Mehmedaj është vetëplagosur aksidentalisht. Mesohet se në bashkëpunim me mikun e tij Gledis Mlloja, 20 vjeç, kanë fshehur vendin e ngjarjes, kanë inskenuar një variant ndryshe të ngjarjes, duke u përpjekur të ndryshojnë tërësisht rrethanat e saj, si dhe kanë fshehur provat materiale.
Pas përfundimit të hetimeve, policia ka bërë të mundur arrestimin në flagrancë të shtetasi Isak Mehmedajt, i cili është jashtë rrezikut për jetën në Spitalin Rajonal të Shkodrës. Ai akuzohet për prodhim dhe mbajtje pa leje e armëve luftarake dhe municionit, si dhe veprime që pengojnë zbulimin e së vërtetës, e kryer në bashkëpunim. Po ashtu, për veprën e fundit penale është arrestuar në flagrancë edhe miku i tij, Gledis Mlloja, i cili e ka ndihmuar për fshehjen e ngjarjes./Opinion.al
