Këshilli i Ministrave ka vendosur të shfuqizojë vendimin e mëparshëm që parashikonte kalimin e godinës së fakultetit Gjeologji-Miniera në administrimin e ministrisë së Drejtësisë.
Vendimi i mëparshëm parashikonte që godina e fakultetit të përdorej në funksion të Gjykatës së Lartë. Vendimi i vitit 2014 ka shkaktuar jo pak debate e kundërshti nga radhët e pedagogëve dhe studentëve që kundërshtonin qeverinë.
Në atë kohë gjatë një proteste që u zhvillua përpara Kryeministrisë, Edi Rama doli në shesh dhe debatoi me studentët dhe pedagogët.
Debati i Ramës me studentët e pedagogët (viti 2014)
Pedagogu: Shoku Kryeministër, ne nuk bëjmë kompromis për atë Fakultet, nuk do të ikim. Kam vite që punoj aty.
Kryeministri Rama: O shoku profesor, a të flas unë? Tani jam i privilegjuar që të njoh. Meqë më thua shoku Kryeministër, po të them shoku profesor. Dola t’ju respektoj, më lini të flas! Kam thirrur rektorin dhe dekanin dhe ju kam thënë se nuk është vendimi i qeverisë: ikni ju, dilni në rrugë.
Studentët: Kemi ardhur për protestë, nuk ikim pa zgjidhje! Ty të duket e drejtë të dalë Gjeologjiku nga ajo godinë?
Kryeministri Rama: E kuptoj që ishit të surprizuar se e kishit lënë të bërtisnit e unë ju dola për diskutim, por nuk e kuptoj pse bërtisni. Po jua them edhe një herë, i kam thirrur dekanin dhe rektorin dhe u kam thënë t’ju sqarojnë se nuk ka arsye për protesta, nuk ka urdhër që ju të dilni jashtë asaj godine. Mos më bëj propagandë!/ Opinion.al
