Shërbimi rus i sigurisë FSB tha se ka identifikuar një shtetas të dytë ukrainas të akuzuar se ka marrë pjesë në sulmin në të cilin Darya Dugina, vajza e filozofit ultra-nacionalist Alexander Dugin, u vra më 20 gusht në perëndim të Moskës.
Bëhet fjalë për Bodan Petrovich Tsyganenko, i cili dyshohet se ka bashkëpunuar me Natalya Vovk, dhe akuzohet se ka shpërthyer bombën në makinën e Duginës.
Sipas shërbimeve ruse, 44-vjeçari është gjithashtu agjent i shërbimeve sekrete ukrainase, dhe akuzohet se ka organizuar dhe kryer sulmin.
Tsyganenko dyshohet se hyri në Rusi nga Estonia më 30 korrik dhe u largua nga vendi një ditë para se Dugina të vritej. FSB e akuzon atë se i ka dhënë Vovk-ut targa false dhe dokumente false nën emrin e një shtetasi kazak, si dhe ka paketuar bombën e përdorur për sulmin.
Ndërkohë, shërbimi rus i sigurisë shton se hetimet për të identifikuar bashkëpunëtorët e tjerë vazhdojnë./Opinion.al
