Atë që artikulohej nën zë në rrethin e politikës sot e tha me zë të lartë Lulzim Basha. Në Parlament u votua në mes të prillit për një shtesë kredie tek Banka Islamike me vlerën e 35 milionë eurove dhe kjo vetëm 4 km rrugë të aksit Tiranë-Elbasan. Kujtojmë se kjo rrugë ka “ngrënë” deri tani 222 milionë USD dhe ende s’ka përfunduar edhe pse punimet kanë nisur në 2011-ën.
Basha: 35 milionë dollarë për rrëshqitjen e rrugës së Elbasanit është çmimi që pagoi Edi Rama për t’i mbyllur gojën Ilir Metës që zotoheshe që s’do kishte zgjedhje pa opozitën. 35 milionë dollarë të shqiptarëve për ta ulur në karrigen e Presidentit dhe për t’i mbyllur gojën. Ky është pazari. Kjo është republika e vjetër.
Me këto shifra të frikshme ajo mund të quhet një “varrezë parash”. Shprehja nuk është një gjetje mediatiake. Këtë e ka deklaruar vetë Pandeli Majko më 10 prill të këtij viti në komisionin e Ligjeve. Kërkesa për shtesë fondesh u bë nga Ministria e Transporteve e drejtuar nga ministri i LSI, Sokol Dervishi.
Majko: Diskutojmë për një projekt që ka pas vlerën 222 milion dhe po shtohet gati 20% e vlerës, po diskutohet një vlerë prej 35 milion dollarë shtesë vetëm për 4 km skarpate siç thoni ju. Po 35 milion dollarë dhe ne që jemi pak injorantë në ndërtimin e rrugëve arrijmë të kuptojmë dhe duam shpjegime më tepër për këtë. Pyetja është pak a shumë e qartë, përgjigjia është shumë e dyshimtë. Pse është dështuar me studimin gjeologjik, kush mban përgjegjësi për këtë? Duam shpjegime të qarta përpra se të votohet në këtë drejtim dhe e duam me zë dhe me figurë.
Doshi: Në një kohë që ne diskutojmë me bë një urë apo një rrugë për shumë banorë të zonave malore, ky është një turp për ne që të miratojmë. Keni abuzu boll me 20% dhe 30%, e di që ju duhet si parti 20% tani por nuk është koha që ta kalojmë.
Pra, për herë të parë ishte Tom Doshi ai që i dha Edi Ramës se po i jep 20-in Ilir Metës në prag të fushatës.
Por gjithsesi edhe pse pati kundërshti, socialistët e votuan marrëveshjen, pasi si duket lideri i tyre kishte rënë dakord me kreun e LSI.
Kësisoj parlamenti e votoi në Prill ratifikimin e marrëveshjes me Bankën Islamike për Zhvillim e cila do të financojë edhe 35 milionë dollarë shtesë për rrugën Tiranë-Elbasan. /Opinion.al
