Dhuna brenda familjes duket se po kthehet në një fenomen shqetësues për shoqërinë shqiptare.
Denoncimet e vazhdueshme tregojnë se janë të shumta rastet e dhunës psikologjike dhe asaj fizike, ushtruar kryesisht nga burrat te bashkëshortet e tyre.
Policia e Tiranës, në bazë të njoftimeve të marra në numrin e emergjencave 112, mbi konflikte në familje, kanë bërë të mundur arrestimin në flagrancë, në kohë dhe vende të ndryshme, të katër shtetasve.
Tre prej tyre ushtronin dhunë ndaj grave të tyre, ndërsa një djalë i ri, vetëm 19 vjeç, ka dhunuar babain e tij.
Të arrestuarit janë:
– Adrian B., 41 vjeç, banues në Tiranë, ka thyer urdhërin e Gjykatës dhe ka ushtruar dhunë fizike e psikologjike ndaj bashkëshortes së tij, shtetases I. B.
– Alket K., 43 vjeç, banues në Tiranë, i proceduar më parë për dhunë në familje, ka shkelur urdhërin e Gjykatës dhe ka ushtruar dhunë psikologjike ndaj bashkëshortes së tij, shtetases A. K.
– Elduin T., 19 vjeç, banues në Tiranë, ka ushtruar dhunë fizike e psikologjike, duke i shkaktuar dëmtime për shëndetin, babait të tij, shtetasit K. T.
– Ervis Sh., 28 vjeç, banues në Tiranë, ka ushtruar dhunë fizike e psikologjike ndaj bashkëshortes së tij, shtetases M. Sh.
Materialet proceduriale i’u kaluan Prokurorisë pranë Gjykatës së Shkallës së Parë Tiranë, për veprat penale “Dhuna në familje” dhe “Veprime në kundërshtim me vendimin e gjykatës”, parashikuar nga Nenet 130/a dhe 321 të Kodit Penal..
