Propozimi i Partisë Demokratike për ngritjen e një strukture të posaçme për Reformën Zgjedhore është refuzuar nga OSBE dhe Bashkimi Europian. Zëdhënësja e BE, Maja Koçiajançiç është shprehur për mediat se kjo nuk është një çështje që i takon Bashkimit Europian dhe i ka bërë apel palëve për dialog
“Nuk i takon Bashkimit Europian që të përcaktojë ose të bëjë komente mbi strukturën që duhet të përdoret për të lehtësuar konsultimet dhe më tej reformën zgjedhore. BE rithekson nevojën që të gjithë aktorët politikë të demonstrojnë gatishmëri të vërtetë për të kontribuar, përmes dialogut konstruktiv dhe të avancojnë punën për reformën zgjedhore” tha Koçiajançiç.
Të njëjtin qëndrim kanë mbajtur edhe opozita parlamentare lidhur me këtë propozim. Bashkëkryetarja e komisionit për Reformën Zgjedhore, Rudina Hajdari dhe deputeti Ralf Gjoni janë shprehur se Bashkimit Europian dhe OSBE nuk mund të angazhohen në struktura të tilla pasi është jashtë kompetencave të tyre dhe nënvizuan gjithashtu se reforma mund të kryhet vetëm përmes strukturave parlamentare.
“Si Bashkimi Europian, apo OSBE nuk merren dot me marrëveshje jashtë institucioneve, nuk janë të mandatuara për këtë punë”, tha Rudina Hajdari duke shtuar se për opozitën jashtë parlamentit se “Janë jashtë institucioneve të Shqipërisë dhe duhet ta kuptojnë këtë realitet. Por kjo nuk do të thotë ata duhet të jenë vendimmarrës”.
“Legjitimiteti i komisionit dhe parlamentit nuk përcaktohet nga ato parti që kanë dalë jashtë këtij parlamenti. Reforma zgjedhore do të organizohet vetëm në gjirin e komisionit të posaçëm parlamentar për reformën zgjedhore”, tha deputeti Ralf Gjoni.
Propozimi i opozitës së bashkuar parashikonte ngritjen e një strukture të përbërë nga përfaqësues të organizmave ndërkombëtarë (OSBE/ODIHR, BE, SHBA), një përfaqësues i mazhorancës dhe një i opozitës së bashkuar për të organizuar reformën zgjedhore.
Ambasadori i OSBE, Bernard Broschard, e refuzoi këtë propozim dhe të njëjtin qëndrim mbajti edhe kryeministri Rama i cili tha se reforma do të ndahet në 2 faza, ku e para do të jetë miratimi në bllok e pa ndryshime i rekomandimeve të ODIHR.
Megjithatë qasja e tij duket se nuk gjen mbështetjen e opozitës parlamentare, e cila ka votat për miratim. /Opinion.al
