Ish-ministri i Jashtëm, Ditmir Bushati ka deklaruar se vendimi i kushtëzuar i Bundestagut gjerman në lidhje me çeljen e negociatave duhet shërbejë si nxitës për ngritjen e një platforme të cilën ai quan Pakti Kombëtar për Europën.
“Një Pakt Kombëtar për Europën që shtrihet përtej kushtëzimeve të Bundestagut gjerman sepse po të lexojmë dokumentin, dokumenti nuk ka të bëjë thjesht vetëm me fillimin e bisedimeve për anëtarësim dhe punën konkrete për hapjen e kapitujve për anëtarësim, por është një dokument që do ta shoqërojë deri në fund procesin e anëtarësimit të Shqipërisë” deklaroi Bushati.
Në një intervistë për DW, Bushati tha se pavarësisht kushteve është e rëndësishme që të ndërtojmë një shoqëri europiane dhe nënvizoi kritikën e tij për mënyrën se si është trajtuar procesi dhe theksoi që është e rëndësishme që të dilet nga “labirinti i vetëmashtrimit”.
“Besoj është nevoja e brendshme jona për të ndërtuar një shoqëri europiane këtu. Për të ndërtuar një shoqëri të së drejtës dhe jo një shoqëri tregu; për të ndërtuar një shoqëri që bazohet tek ekonomia e dijes dhe jo një shoqëri që bazohet tek krahu i lirë i punës; për të ndërtuar një kapitalizëm demokratik ku i jepet mundësia secilit të ofrojë më të mirën dhe jo një kapitalizëm grabitqar. Deri tani, për fat të keq, ne këtë proces e kemi trajtuar si një çështje kushtëzimesh dhe shumë pak e kemi trajtuar si një çështje që ka të bëjë me standardet e prekshme të jetës tonë në praktikë. Prandaj mendoj se sa më shpejt që të dalim nga labirinti i vetëmashtrimit, aq më shumë do të kemi mundësi për t’i ofruar qytetarëve tanë një perspektivë të prekshme në këtë drejtim” tha Bushati.
Ish-ministri i jashtëm foli edhe në lidhje me rastin e Shkodrës dhe pozitën e tij brenda Partisë Socialiste. Ai kritikoi në mënyrë ‘diplomatike’ sistemin të cilin e quajti ‘virus’ nëpërmjet të cilit njerëz me të shkuar problematike depërtojnë në instancat e larta. Sipas tij ky fenomen zgjidhjet duke nxitur garën brenda partisë dhe zhvillimin e zgjedhjeve duke lënë të kuptohet se një gjë e tillë deri tani ka munguar. Më tej ai theksoi se vetëkorrigjimi i partive në pushtet është i domosdoshëm pasi në këtë mënyrë shmangin vetëshkatërrimin. Qëndrimin alternativ nga kryesia e PS, Bushati e cilësoi si një kontribut brenda partisë dhe mohoi një plan të tijin për ngritjen e një lëvizjeje të re.
“Fakti që kjo lloj “sëmundjeje”, ky lloj “vesi” nuk është trajtuar në rrugën e duhur duhet të na shtyjë të mendojmë që jeta politike në Shqipëri ka nevojë për një reformë më të madhe. Ne nuk duhet të kemi frikë nga gara, në radhë të parë brenda partive tona politike, sepse një garë në politikë përkthehet në më shumë garë në jetën ekonomike të vendit dhe më shumë garë në jetën publike. Prandaj mendoj që reformimi i mëtejshëm i jetës politike do të jetë një “ilaç” edhe për këtë “virus” që ka prekur politikën.
Fakti që sot për sot kam artikuluar jo vetëm brenda strukturave të Partisë por edhe publikisht disa qëndrime që mund të perceptohen si disi të ndryshme me qëndrimet e udhëheqjes së Partisë Socialiste nuk do të thotë që kam një projekt tjetër përveçse kontributit brenda Partisë Socialiste. Unë besoj se vetëkorrigjimi është një proces fiziologjik i domosdoshëm për çdo forcë politike, sidomos kur je në vitin e shtatë të qeverisjes sepse vetëkorrigjimi do të parandalonte një lloj vetëshkatërrimi” deklaroi Bushati. /Opinion.al
