Presidenti Ilir Meta ka reaguar në lidhje me 3 vjetorin e ndryshimeve kushtetuese, për reformën në drejtësi. Ndryshe nga herë te tjera, Meta në reagimin e tij e vë theksin vetëm tek miratimi në Kuvend, që sipas tij Shqipëria gëzon ende rekomandimin historik për çeljen e negociatave me Bashkimin Europian prej tre vitesh.
“Krenar që 3 vjet më parë, në detyrën e Kryetarit të Kuvendit, këmbëngula për miratimin me konsensus të plotë të Reformës në Drejtësi, për të mos lejuar kapjen e sistemit përmes ndryshimeve kushtetuese. Sot kam një falënderim të veçantë për Komisionin e Venecias, për të gjithë ekspertizën e vyer e të pakursyer, që na dha në atë proces. I lumtur që i qëndrova besnik rekomandimeve të këtij Komisioni për reformën kushtetuese, që garantonin pavarësi dhe paanshmëri të drejtësisë nga politika”, shkruan kreu i shtetit.
Tre vjet më pas, thekson Meta, secili nga ne mund të bëjë vlerësimet e tij për këtë reformë. Ai thotë se bazat e ndryshimit rrënjësor të sistemit të drejtësisë janë në ligjin themeltar të shtetit dhe të qarta si drita e diellit.
“Lidhur me çështjen se kur do të çelen negociatat, kjo do të ndodhë vetëm atëherë kur të gjithë qytetarët shqiptarë të ushtrojnë sovranitetin e tyre përmes zgjedhjeve të lira, të ndershme, demokratike, gjithpërfshirëse dhe të gjithëpranuara, për çdo nivel përfaqësimi politik dhe institucional. Fillimi i negociatave do të jetë i mundur kur zbatimi i Reformës në Drejtësi të shkojë në drejtim të forcimit të shtetit ligjor, mbrojtjes së interesit publik, dhe garantimit të të drejtave demokratike dhe lirive themelore të qytetarëve të Shqipërisë”, shkruan presidenti Meta, i cili ditët e fundit ka akuzuar qeverinë dhe një pjesë të ndërkombëtarëve se nga refromë në drejtësi, po zbatohet në “Ramaformë”./ Opinion.al
