Qeveria e Presidentit Emmanuel Macron njoftoi muajin e kaluar se po ndalonte abajat-veshjeve islamike në shkolla pasi shkelte rregullat për sekularizmin në arsim.
Shamitë myslimane tashmë janë ndaluar me arsyetimin se ato përbëjnë një shfaqje të përkatësisë fetare.
Një shoqatë që përfaqëson muslimanët paraqiti një mocion në Këshillin e Shtetit, gjykatën më të lartë të Francës për ankesa kundër autoriteteve shtetërore, për një urdhër kundër ndalimit të veshje islamike.
Shoqata tha se ndalimi ishte diskriminues dhe mund të nxiste urrejtje kundër muslimanëve, si dhe profilizimin racor. Por pas shqyrtimit të mocionit të paraqitur nga Aksioni për të Drejtat e Myslimanëve (ADM) për dy ditë, Këshilli i Shtetit hodhi poshtë argumentet.
Ai tha se veshja e abajas “ndjek logjikën e afirmimit fetar”, duke shtuar se vendimi bazohej në ligjin francez, i cili nuk lejonte askënd të mbante shenja të dukshme të ndonjë përkatësie fetare në shkolla.
Ndalimi nga qeveria, tha ajo, nuk shkaktoi “dëm serioz ose dukshëm të paligjshëm ndaj respektimit të jetës personale, lirisë së fesë, të drejtës për arsimim, mirëqenies së fëmijëve ose parimit të mosdiskriminimit”.
Përpara vendimit, Këshilli Francez i Besimit Mysliman (CFCM), i krijuar për të përfaqësuar myslimanët para qeverisë, kishte paralajmëruar se ndalimi i abajas mund të krijonte “një rrezik të rritur diskriminimi” dhe tha se po konsideronte të paraqiste ankesën e tij përpara shtetit.
Mungesa e “një përkufizimi të qartë të kësaj veshjeje krijon paqartësi dhe pasiguri ligjore”, tha ai.
Presidenti i ADM Sihem Zine tha se rregulli ishte “seksist” sepse ai veçon vajzat dhe “shënjestron arabët”. Por ministria e arsimit tha se abaja i bënte mbajtësit e saj “menjëherë të njiheshin se i përkisnin fesë myslimane” dhe për këtë arsye binte ndesh me kulturën laike të Francës.
Shkollat franceze dërguan dhjetëra vajza në shtëpi pasi refuzuan të hiqnin abajat e tyre- një veshje e sipërme nga shpatullat te këmbët- në ditën e parë të vitit shkollor të hënën.
Gati 300 nxënëse kundërshtuan ndalimin, tha ministri i Arsimit Gabriel Attal. Shumica ranë dakord të ndërronin rrobat, por 67 refuzuan dhe u dërguan në shtëpi, tha ai. Rreth 10 për qind e 67 milionë banorëve të Francës janë myslimanë, sipas vlerësimeve zyrtare. Shumica kanë origjinën në vendet e Afrikës Veriore Algjeria, Maroku dhe Tunizia, të cilat ishin koloni franceze deri në gjysmën e dytë të shekullit të 20-të./Opinion.al
