1

Protesta e 16 shkurtit, Bardhi: Vazhdimësinë do ta përcaktojnë qytetarët

               Publikuar në : 11:17 - 12/02/19 |
d.l

Seketari i Përgjithshëm i Partisë Demokratike, Gazmend Bardhi, tha mbrëmë në një intervistë televizive për gazetarin Ilir Babaramo, se në protestën e 16 shkurtit do të sigurohet që të mos cënohet asnjë nga qytetarët që do të marrin pjesë në protestë, por janë qytetarët sipas tij që do të përcaktojnë formën e protestës.

“PD ka për detyrë të garantojë sigurinë e qytetarëve në protestën e 16 shkurtit dhe do ta bëjë këtë. Mënyra, forma, elementët që njerëzit zgjedhin për të protestuar janë zgjedhja e tyre.”

Përsa i përket skenarit, vijimit të protestës, formës apo afateve te saj, Bardhi tha se kjo do të vendoset me 16 shkurt me qytetarët.

“16 shkurtit është një protestë e qytetarëve, të cilët janë nëpërkëmbur nga qeveria dhe kanë gjithë të drejtën të ngrihen e të bëjnë që zëri i tyre të dëgjohet. Çdo opsion për formën e protestës është i hapur. Nuk përjashtoj asnjë nga ata që janë thënë, por mund të ketë edhe të tjera. Do ta vendosim atë ditë me qytetarët.”- tha Bardhi.

Më tej Bardhi tha se kryeministri Rama ka humbur legjitimitetin edhe te vetë socialistët.

“Në protestë do të ketë edhe socialistë, të cilët na kanë pritur gjatë takimeve tona në qytete të ndryshme të vendit  Janë të zhgënjyer sepse e kanë parë që kjo nuk është qeveri e PS por qeveri e Edi Ramës. Gjysma e ministrave nuk kanë lidhje me PS, por janë shokë dhe miq të Edi Ramës ose gruas së tij. Nuk është një betejë mes forcave politike, por një qeverie që e ka lidhur fatin e vet me krimin dhe jo me qytetarët. Prandaj, 16 shkurti nuk është protestë politike, por është qytetare. Edhe pse ka 75 deputetë, Rama do të rrëzohet nga presioni i popullit.”- tha Sekretari i Përgjithshëm i PD. Dl

 

 

Pas