Policia Shqiptare në bashkëpunim me policinë italiane kanë publikuar rezultatet e një operacioni ndërkombëtar të trafikut të drogës të koduar ‘Lulet e Pranverës’.
Mësohet se operacioni në Shqipëri është shtrirë në disa qytete, si në Durrës, Vlorë dhe në Lezhë ndërsa në Itali është zhvilluar në Calabri, Toscana, Emilia Romagna, Sicili dhe Lombardi.
‘Lulet e Pranverës’ ka goditur 4 grupe kriminale dhe është finalizuar me 27 të arrestuar, 21 prej të cilëve shqiptarë të arrestuar në të dyja anët e Adriatikut. Vetëm në Vlorë janë arrestuar nga policia shqiptare 6 persona, përkatësisht Luka Beqiraj, Bilbil Kabello, Arbnor Hoxhaj, Denis Pashaj, Kujtim Elmazi dhe Kristian Llanaj.
Dy vite hetime kanë bërë të mundur që të identifikohen dhe kapen pjesëtarët e grupeve kriminale italo-shqiptare me baza operative në provincën e Leçes dhe degë në rajonet e tjera italiane dhe të gjithë përgjegjës për trafik ndërkombëtar droge, posedim dhe futje në territor italian të armëve dhe municioneve ushtarake.
Në videokonferencën e organizuar në Tiranë merrte pjesë edhe prokurori i Antimafias italiane, De Raho. Ai tha se shkatërrimi i katër grupeve kriminale është bërë nga një skuadër e përbashkët mes Shqipërisë dhe Italisë. Sipas tij, sasia e drogës që trafikonin këto grupe kriminale kishte si denstinacion vendet europiane./E.M
