Mëngjesin e kësaj të enjte dy ish-deputetët e Partisë Demokratike, Jorida Tabaku dhe Oerd Bylykbashi kanë zhvilluar një takim me përfaqësuesit e Komisionit të Venecias të cilët ndodhen në Tiranë.
Ky takim sipas dy ish-deputetëve u realizua për të analizuar të gjithë problematikat e hasura me pronat në Shqipëri.
Tabaku theksoi pas këtij takimi për mediat se politikat e qeverisë Rama kanë përkeqësuar gjendjen lidhur me pronat. Gjithashtu ajo u shpreh rreth detajeve që u diskutuan.
“Ne patëm mundësi t’u shpjegojmë se çfarë ka ndodhur me pronat që nga viti 2013. Diskutuam gjerësisht dekretin e presidentit për kadastrën. Shpalosëm çdo gjë që ka ndodhur me pronën private dhe atë publike. Çështja e pronave është vënë në fokus si një ndër kriteret që duhen respektuar për çeljen e negociatave. Të drejtën e pronës nuk e merr askush, as Edi Rama”,-tha Tabaku.
Ndërsa Bylykbashi u shpreh se Kryeministri Rama ka bllokuar procesin e kthimit të pronave tek ish-pronarët.
“Shpjeguam themelin e mekanizmin djallëzor që ka futur Rama në raport me të drejtën e pronarëve për të marrë të drejtën e tyre. Rama ka vënë një mekanizëm me të cilën ka rishpronësuar sërish pronarët. Ky proces bllokoi kthimin e pronave. Ka një qëllim të vetëm, që të marrë këto prona e t’ua japë oligarkëve për të zhvilluar interesin e tyre, sikur të ishte interes publik. Fikja dhe eleminimi i Gjykatës Kushtetuese dhe bllokimi i sistemit të drejtësisë është i qëllimshëm për këtë mekanizëm, që pronarët të mos ankohen te gjykata Kushtetuese. Këto ligje që shkojnë në dëm të pronarëve, PD do t’i zhbëjë”-vijoi ish-deputeti i PD-së./Opinion.al/
