Një ditë pas shpalljes së fituesve në universitete dhe ankesave të pafundme të maturantëve që nuk u kualifikuan si fitues, Opinion.al ka kontaktuar me Sekretarin e Përgjithshëm të Ministrisë së Arsimit, Plarent Ndreca. Ai, u ka sugjeruar maturantëve të ndjekin të gjithë hapat e konkurimit, pasi do të ketë të tjerë fitues në ditët në vijim.
Më poshtë bashkëbisedimi me z.Plarent Ndreca, Sekretar i Përgjithshëm i MAS.
Pyetje: Një ditë pas shpalljes së fituesve në universitete ka patur shumë ankesa. Maturantët dhe prindërit e tyre ua vënë fajin skemës së hartuar nga MAS për përzgjedhjen e fituesve. A është njohur ministria me keto ankesa? Nese po a ka vend per korrigjime?
Në Ministrinë e Arsimit dhe të Sportit nuk ka ardhur asnjë ankim zyrtarisht nga maturantët që janë aplikues për tu pranuar në institucionet e arsimit të lartë.
Ne jemi të njohur me shqetësime që vijnë kryesisht nga subjekte mediatike.
Skema e re, aplikuar nga Ministria e Arsimit dhe e Sportit bazuar në ligjin e ri të arsimit të lartë, është një skemë që bazohet në një sistem elektronik, transparent, konkurues, “një metër për të gjithë” maturantët dhe njësoj për të gjithë shkollat publike dhe private (natyrisht duke ruajtur specifikat dhe kriteret e pranimit nga njëra shkollë në tjetrën).
Nëpërmjet kësaj skeme, sot, të gjithë mund të bëjnë parashikime, analiza, e të nxjerrin konkluzione mbi të dhënat e aksesueshme.
Skema garanton deri në dhjetë aternativa zgjedhje nga maturantët dhe po aq mundësi pranimi në IAL për ta. Në ndryshim nga vitet e kaluara vendimin e maturantit për tu rregjistruar në një IAL fituese, nuk e bën sistemi elektronik, por vetë maturanti.
Gjithashtu kjo skemë krijon kushtet dhe mundësitë që aplikantët jo fitues të raundit të parë, të rishikojnë zgjedhjet e tyre dhe të riaplikojnë mbi bazen e një panorame të qartë që krijohet pas rregjistrimeve në raundin e parë.
Për rrjedhojë gjykoj që skema e ndërtuar nga ana e MAS, garanton mundësi për të gjithë ata që e meritojnë të vijojnë studimet në një IAL publike apo private.
Pyetje: Ka raste kur maturantë me mesatare 9.5 nuk kanë fituar asnjë nga 10 degët e listuara. Çfarë do te behet me ta, a ka nje shans të dytë?
Rasti qe Ju permendet, studenti me mesatare 9.5, mundet të mos jetë shpallur fitues, pasi ka aplikuar në 10 programe studimi, ku ka një konkurence të fortë për shkak të mesatares së lartë të aplikanteve. Por sigurisht që ky student ka një mundësi të dytë, pasi pas rregjistrimit të fituesve të raundit të parë, do jetë akoma më e qartë mundesia për secilin prej aplikanteve.
A keni nje mesazh te drejpërdrejt sot nje dite pas shpalljes se fituesve, qe shkon per studentet e rinj dhe prinderit e tyre?
Mesazhi ynë për të gjithë maturantët dhe prindërit e tyre është që nuk ka asnjë vend për tu shqetësuar, ky është vetëm hapi i parë i një procesi që vijon dhe garanton pa asnjë mëdyshje transparence maksimale, konkurence të ndershme bazuar në parimin meritë preference dhe “një metër për të gjithë”.
Ministria e Arsimit dhe e Sportit është garante e këtyre parimeve dhe është në ndjekje të gjithë kësaj procedure që realizohet në bashkëpunim me institucionet e arsimit të lartë. /Riviera Dedaj, Opinion.al
Lexo edhe: http://opinion.al/kaos-me-pranimet-ne-universitete-akuza-mas-po-con-studentet-tek-privati/
