Policia e Shtetit ka caktuar 100 kuota pranimi për ata që duan të vijojnë studimet 1-vjeçare në Akademinë e Sigurisë.
Ky lajm u bë i ditur nga zv.ministrja e Brendshme Romina Kuko, e cila ka dhënë detaje për kriteret që duhet të plotësojnë konkurrentët.
Përmes një deklarate për media, Kuko deklaroi se janë 100 kuota të lira në rang vendi këtë vit.
Zv.ministrja theksoi po ashtu se mesatarja e pranimit në Akademinë e Sigurisë duhet të jetë nota 8 e lart në të dy ciklet e studimit, pra bachelor dhe master.
“Aplikimet bëhen pranë drejtorive vendore të policisë ku aplikanti ka vendbanimin e përhershëm. Kuotat e pranimit të shtetasve që kanë përfunduar ciklin e parë dhe të dytë të studimeve të arsimit të lartë në shkencat juridike, ekonomike ose kompjuterike janë të ndara sipas nevojave të drejtorisë së policisë në nivel vendor. 17 kuota në Korçë, 5 kuota në qarkun Berat, 8 kuota në qarkun Fier, 13 kuota në qarkun Vlorë, 16 kuota në qarkun Gjirokastër, 13 kuota në qarkun Shkodër, 16 kuota në qarkun Kukës dhe 12 kuota në qarkun Dibër. Pas përfundimit të konkurrimit renditja e aplikantëve fitues sipas rezultateve të arritura do të bëhet në nivel qarku në bazë të kuotave të shpallura”,shtoi ajo.
Kuko listoi numrin e kuotave në disa drejtori vendore të Policisë, ku nevojën më të madhe sipas zv.ministres e ka Korça, Gjirokastra dhe Kukësi./Opinion.al
