Aktualitet

Përkujtohet 21-vjetori i vdekjes së Heroit të Demokracisë, Azem Hajdari


               Publikuar në : 08:51 - 12/09/19 |
Al Do

Sot përkujtohet 21-vjetori i vrasjes së Azem Hajdarit. Ish-udhëheqësi i Lëvizjes Studentore të Dhjetorit 1990 u qëllua për vdekje pranë selisë së Partisë Demokratike më 12 Shtator 1998.

Azem Hajdari është shpallur Hero i Demokracisë. Ai ishte një nga themeluesit e Partisë Demokratike dhe Kryetar i Komisionit Nismëtar të kësaj partie.

Një nga zërat më të spikatur të Partisë Demokratike, deputeti Hajdari mbajti disa pozicione si Kryetar i Komisionit Parlamentar për Rendin Publik dhe Shërbimit të Inteligjencës Kombëtare nga viti 1992-1996. Në vitin 1996 ai ishte Kryetari i Komisionit Parlamentar për Rendin Publik dhe Shërbimin Kombëtar të Inteligjencës dhe në Nëntor 1996 u bë President i Sindikatave të Bashkuara të Pavarura Shqiptare. Në qershor 1997 ai u bë Kryetari i Komisionit Parlamentar të Mbrojtjes.

Pas disa atentateve, Azem Hajdari u ekzekutua në hyrje të selisë së Partisë Demokratike mbrëmjen e 12 Shtatorit 1998. Vrasja e tij u cilësua si “Vrasja e Shekullit” për impaktin që pati në jetën politike të vendit por edhe për misterin që e mbulon sot e kësaj dite.

Sot e gjithë politika e kujton figurën e tij. Mësohet se në orën 9:15, Presidenti Ilir Meta do të kryejë homazhet te memoriali i tij. Kuvendi do të kryejë homazhe në varrin e ish deputetit Azem Hajdari në orën 9, ku do të marrin pjesë përfaqësues të të gjitha grupeve parlamentare.

Partia Demokratike do të organizojë homazhe pranë memorialit të Azemit në orën 10:00 dhe kryetari Basha do të mbajë një deklaratë në orën 10:30. Më pas anëtarët e Partisë Demokratike do ti drejtohen varrezave të Dëshmorëve për të mbyllur homazhet me vizita në shtëpinë e familjarëve t ëish-deputetit Azem Hajdari. /Opinion.al

Pas