Duke ju marrë goja dhe në tension, deputeti socialist dhe Kryetari i Komisionit të Ligjeve Ulsi Manja, në një deklaratë për mediat nga kryesia e Kuvendiut, në lidhje me përgjimet e publikuara nga ‘Bild’ e drejtoi gishtin nga opozita. Sipas tij në këto përgjime prishet imazhi i Shqipërisë që ka marrë rekomandimin pozitiv për hapjen e negociatave. Përgjimet Manja i cilësoi si thashethem.
“Unë nuk jam i shqetësuar për përmbajtjen e përgjimeve dhe personave që përfshihen në këto përgjime” tha Manja, “Jam këtu i shqetësuar për dy gjëra, e para është koha që Prokuroria dhe Policia Gjyqësore të vlerësojë seriozisht çështjen e daljes në publik të sekretit hetimor. Të hetohet kush prej prokurorëve i çoi përgjimet në zyrat e PD”. Këto ishin fjalitë hapse të fjalës së tij përpara medias.
Për kryetarin e Komisionit të Ligjeve gjendja është shumë e rëndë meqenëse dalin përgjime nga dosja duke thyer sekretin hetimor, por nuk është aspak e rëndë që kryetar bane vendos për deputetët e listës së PS në Durrës (kjo është thënë në përgjime).
“Koha për tu ndarë me zyrtarë të tillë publik është sot, për këtë arsye ne kemi ndërmarrë këtë reformë në drejtësi”, vazhdoi më tej Manja. Sipas tij nxjerrja e sekretit hetimor ka prishur hetimet.
Po pse vallë? Emrat që janë përfolur në përgjimet e publikuara nga ‘Bild’ janë të gjithë persona brenda territorit të Shqipërise dhe mund të thirren nga prokuroria që nesër.
Kryetari i Komisionit të Ligjeve theksoi edhe njëherë se sa i tronditur është për përdorimin politik të dosjes 339 nga ana e Partisë Demokratike, e cila sipas tij po na kthen në kohën e gjyqeve publike të Enver Hoxhës.
Nga sa na ka sugjeruar deri tani dosja 339 nuk mund të ketë implikime te tjera përveç se politike pasi janë pikërisht politikanë ata që bisedojnë me kriminelë e trafikantë. Përsa i përket implikimeve ligjore padyshim që ende nuk mund të flasim, e këtë nuk e ka bërë akoma njeri, por presim Prokurorinë që kërkon të marrë kohën e sajë për ta vlerësuar dosjen, të paktën kështu u shpreh para disa javësh kryeprokurorja. /Opinion.al
