Deputeti i PS-së Ilir Ndraxhi dhe Kryetari i Bashkisë së Shijakut Ardian Kokomani, dy figura të përmendura në përgjimet e publikuara nga gazeta ‘Bild’, kanë komentuar në media qëndrimet e tyre.
Ndraxhi ka thënë se ende nuk është vënë në dijeni të përgjimeve dhe mohon çdo lloj njohjeje me Astrit Avdylin, pavarësisht se vëllai i tij komunikon në përgjim me këtë të fundit në lidhje me futjen në listat e PS të Ilir Ndraxhit. Ai mohon gjithashtu të ketë komunikuar me vëllain në lidhje me përgjimet.
Nga ana tjetër, Kryetari i Bashkisë së Shijakut ka deklaruar se ai nuk ka asnjë lidhje me Avdylajt dhe se nuk ka qenë në takimin që përflitet në përgjimet e nxjerra. Kokomani ka kryer një telefonatë me Astrit Avdylajn ku ky i fundit i thotë “Nesër kemi një takim në 10 të mëngjesit, unë ti, Gjushi, Liri (Ilir Ndraxhi, deputet i PS-së), vëllai i Lirit dhe Jupi. Do të pimë një kafe nesër në Durrës në orën 10:00”. Për këtë telefonatë Kokomani është shprehur në media se është ndjerë i bezdisur. Madje ai thotë se do të ishte dorëhequr nëqoftëse Avdylajt do të kishin lidhje me fushatën e tij.
I pyetur për mos rikandidimin e tij për bashkinë e Shijakut, Ardian Kokomani thotë se tashmë pas këtyre përgjimeve është e qartë pse ai nuk është rikandiduar. Kjo deklaratë është një shprehje pakënaqësie ndaj PS në Durrës por gjithashtu thellon dyshimet se Avdylajt kanë një ndikim të fortë në vendimmarrje. /Opinion.al
