Ka përfunduar pa sukses një tjetër takim mes përfaqësuesve të Lëvizjes Vetëvendosje dhe Lidhjes Demokratike të Kosovës.
Prej më shumë se dy orësh, Albin Kurti dhe Isa Mustafa zhvilluan bisedime për arritjen e një marrëveshjeje për qeverinë e ardhshme por kjo nuk ka ardhur.
Në një dalje për mediat pas takimit Avdullah Hoti nga LDK-ja dhe Glauk Konjufca nga VV-ja konfirmuan se nuk është arritur ende një marrëveshje.
“Ne po i vazhdojmë takimet, nuk e kemi përmbyllur ende marrëveshjen, ditëve tjera do të takohemi”, është shprehur Hoti.
“Nuk pati marrëveshje, krejt çka mund t’iu them është se duhet të shohim çka mund të ndodhë në takimet e radhës”, ka shtuar Konjufca.
Liderët e partive kanë arritur ti harmonizojnë programet e tyre qeverisëse por ajo që po e pengon arritjen e një marrëveshjeje përfundimtare është ndarja e ministrive dhe në veçanti posti i Presidentit të Kosovës. /Opinion.al
