“Asnjë vend nuk mund të jetë i madh pa zgjedhje të drejta dhe të ndershme”, deklaroi presidenti Donald Trump në një fjalim drejtuar kombit në mbrëmje. Gjatë fjalës së tij, ai ngriti sërish dyshime mbi korrektësinë e zgjedhjeve presidenciale të vitit 2020 dhe e përdori këtë argument për të bindur edhe një herë partinë e tij, e cila kontrollon Kongresin, të miratojë një ligj të quajtur Save America Act.
Projektligji parashikon detyrimin për paraqitjen e një dokumenti identiteti gjatë votimit, si edhe provën e shtetësisë amerikane për t’u regjistruar në listat zgjedhore. Gjithashtu, ai do të kufizonte votimin me postë.
Trump foli për cenueshmërinë e sistemit amerikan të votimit ndaj sulmeve kibernetike nga fuqi armiqësore, kryesisht Kina, dhe tha se pretendimet e tij mbështeten nga dokumente të publikuara në faqen e Shtëpisë së Bardhë gjatë orëve të fundit, të lidhura me zgjedhjet e viteve 2020 dhe 2018.
Megjithatë, vetë këto dokumente nuk i mbështesin pretendimet e presidentit.
Presidenti amerikan tha se ka pasur “komprometimin më të madh të të dhënave zgjedhore të regjistruar ndonjëherë në histori, me përvetësimin e paligjshëm nga Kina të 220 milionë dosjeve të votuesve”, të cilat përmbajnë emra, mbiemra, numra telefoni, përkatësi partiake dhe të dhëna të tjera të ndjeshme të nevojshme për votim.
Por Trump nuk sqaroi se këto të dhëna janë shpesh të disponueshme publikisht në faqet zyrtare të shteteve amerikane ose mund të blihen, dhe se ato nuk mundësojnë domosdoshmërisht ndërhyrjen në rezultatet e një procesi zgjedhor.
Presidenti amerikan nuk paraqiti asnjë provë konkrete që rezultatet e zgjedhjeve të vitit 2020 në Shtetet e Bashkuara janë ndryshuar ose manipuluar. Ai tha se zgjedhjet e Nicolás Maduros në Venezuelë në vitin 2020 ishin të manipuluara, por analiza e CIA-s, e publikuar në faqen e Shtëpisë së Bardhë, tregon se zyrtarët zbuluan se ekzistonin “kapacitete për të manipuluar sistemet elektronike të votimit” për të ndikuar në rezultatet zgjedhore në Venezuelë. Megjithatë, ata paralajmëruan se nuk kishte prova që këto teknologji, të zhvilluara nga kompania Smartmatic, ishin përdorur për “manipulim zgjedhor në shkallë të gjerë” në vend. Mbi të gjitha, analistët e inteligjencës arritën në përfundimin se qeveria e Karakasit nuk kishte aftësinë të ndikonte në zgjedhjet në Shtetet e Bashkuara.
Trump deklaroi gjithashtu se në vitin 2019 qeveria kineze kishte tentuar të dëmtonte atë dhe fushatën e tij për rizgjedhje, pasi Pekini e dinte se ai do të vendoste tarifa doganore ndaj Kinës. Por dokumentet e publikuara nga Shtëpia e Bardhë janë më të kujdesshme në përfundimet e tyre. Ato sugjerojnë se ka prova për fushata ndikimi në favor të Kinës dhe se qeveria kineze ishte skeptike ndaj Trumpit, por ky vlerësim bazohet në opinionin e një pakice agjentësh dhe niveli i besueshmërisë konsiderohet “i ulët” ose “mesatar”, sipas raportit të inteligjencës.
Megjithatë, manjati u ankua se nuk ishte informuar kurrë për këto rreziqe dhe vlerësime të inteligjencës gjatë mandatit të tij të parë presidencial. Për këtë arsye, ai kërkoi hetime ndaj personave që, sipas tij, i përkasin të ashtuquajturit “shtet i thellë”.
Trump tha gjithashtu se në shtetin e Miçiganit ishte zhvilluar një hetim ndaj një grupi që dyshohej se ishte paguar për të regjistruar në mënyrë të parregullt votues gjatë vitit 2020. Presidenti pretendoi se dokumentet ishin deklasifikuar vetëm së fundmi, por në fakt ato ishin bërë publike prej kohësh. Në to thuhet se ish-punonjës të një organizate në atë shtet ishin nxitur të plotësonin një numër të madh regjistrimesh në listat zgjedhore në këmbim të pagesës sipas kuotës së arritur.
Në të vërtetë, disa prej këtyre kërkesave rezultuan “të parregullta”, por zyrtarët lokalë i zbuluan ato në tetor të vitit 2020 dhe, për rrjedhojë, nuk u dërguan fletëvotimet personave që nuk u konfirmuan.
Trump vazhdoi edhe dje të kritikojë votimin me postë, por shumë republikanë në Kongres nuk duan ta bëjnë atë më pak të aksesueshëm, pasi edhe në disa shtete tradicionalisht republikane kjo mënyrë votimi përdoret gjerësisht. Ata kanë frikë se kufizimi i saj mund t’i dëmtojë politikisht.
Pretendimet për manipulim zgjedhor kanë qenë prej kohësh një nga temat kryesore të Trumpit, edhe pse ato nuk janë provuar kurrë. Disa televizione amerikane, përfshirë ABC, NBC dhe CNN, nuk e transmetuan të plotë fjalimin e presidentit, por vetëm disa pjesë të shoqëruara me komente nga gazetarët.
Trump kërcënoi se do t’u hiqte licencat këtyre televizioneve. “Ata e dinë sa i korruptuar është sistemi dhe janë pjesë e komplotit. Duan të mbrojnë të majtën”, deklaroi presidenti.
Demokratët paralajmëruan se Trump po rikthen në qendër të debatit pretendimet për manipulim zgjedhor për të delegjitimuar zgjedhjet e ndërmjetme (midterm), në të cilat Partia Republikane rrezikon të humbasë.
Ndërkohë, televizioni konservator Fox News e transmetoi të plotë fjalimin, por moderatorët e tij u treguan të kujdesshëm dhe nuk konfirmuan asnjë nga akuzat për manipulim zgjedhor. Rrjeti televiziv kishte paguar më parë 787 milionë dollarë për të mbyllur me marrëveshje një proces gjyqësor për shpifje, pasi kishte deklaruar se zgjedhjet e vitit 2020 ishin manipuluar.
Presidenti premtoi gjithashtu se do t’i ndihmojë shtetet amerikane të korrigjojnë dhe të përballen me dobësitë teknike të sistemit të votimit përpara zgjedhjeve të ndërmjetme. Megjithatë, mediat amerikane vënë në dukje se vetë Trump ka shfuqizuar së fundmi një bord të pavarur që lehtësonte procesin e votimit, si edhe agjencinë federale për sigurinë kibernetike./ Corriere della Sera
