Kronikë

Përdhunuan në grup vajzën në Londër, 3 shqiptarët dënohen me 57 vite burg



Bëhu pjesë e Grupit Zyrtar të Opinion.al
>> KËTU <<
               Publikuar në : 11:50 - 09/07/22 |
el ida

Tre shqiptarë të cilët përdhunuan në grup një të re në Londër, janë dënuar me 57 vite burg, raporton DailyMail.

Viktima 23-vjeçare po shijonte natën e parë pas përfundimit të kufizimeve të Covid, kur u nda nga shoqja e saj.

Ajo e gjeti veten të vetme dhe të pambrojtur pasi u largua nga klubi i natës Vogue në Bedford High Street në orët e para të së shtunës, 4 shtator të vitit të kaluar.

Pa djeninë e saj, ajo ishte përndjekur brenda klubit nga Genti Hyka, 31 vjeç, i cili e futi në makinën e tij dhe e çoi në një adresë në qendër të qytetit ku e përdhunoi.

Më pas  31- vjeçarit iu bashkuan edhe dy bashkëpunëtorët e tij, Vullnet Haka, 33 vjeç dhe Ibrahim Bezati 36 vjeç, të cilët bashkëpunuan në dhunën e ushtruar ndaj vajzës.

Mësohet se gruaja u godit me shuplakë në fytyrë dhe u detyrua të merrte kokainë.

Gruaja ka arritur të arratiset nga shtëpia në mëngjes dhe është gjetur në gjendje të rënduar nga kalimtarët.

Në dëshminë e dhënë në Gjykatën e Luton Crown, ajo tha se nuk kujtonte të ish`te larguar nga klubi në orët e para të 4 shtatorit të vitit të kaluar.

“U luta që të më linin të shkoja. Isha e hutuar dhe e frikësuar”, tha e reja gjatë dëshmisë në Gjykatë.

Ndërkohë tre shqiptarët u dënuan me 57 vite burg.

Genti Hyka, u dënua me 26 vjet burg për veprën penale rrëmbim, burgim të rremë dhe dy akuza për përdhunim.

Vullnet Haka, 33 vjeç dhe Ibrahim  Bezati 36 vjeç, të dy nga Bedford u shpallën fajtorë për dëshmi të rreme dhe dy akuza për përdhunim të gruas. Haka u dënua me 14 vjet burg ndërsa Bezati me 17 vjet burg.

Në gjykatë ka dëshmuar dhe shoqja e vajzës e cila deklaroi se kur u larguan nga klubi ajo shkoi djathtas dhe viktima majtas për të shmangur një grup burrash që përlesheshin në rrugë.

Ndër të tjera, në deklaratën e shoqes së viktimës thuhet se vetë ajo kaloi gjysmë ore duke e kërkuar derisa më pas kerkimit iu bashkua një mashkull.

“Rreth orës shtatë e gjysmë të mëngjesit mora një telefonatë nga shoqja e cila ishte duke qarë. Më tha që ndodhet në stacionin e policisë Kempston dhe tha se kishte nevojë për mamin”, deklaroi shoqja e viktimës.

Më tej, shoqja e viktimës deklaroi për jurinë se atë natë kishin shkuar për darkë në Zizzi në Bedford ku hëngrën dhe pinë.  Më pas vazhduan në Slug dhe Lettuce ku pinë koktej, verë dhe tekila përpara se të shkonin në klubin e natës Vogue, thuhet në deklaratën e saj.

E pyetur se sa e pirë nga 1 tek 10 ishte viktima, shoqja e saj u përgjigj 7 ose 8.

Ndërkohë, Hyka i tha gjykatës se kur ata arritën në adresë, vajza pranoi të bënte seks.

Hyka mohon që të jetë përdhunues. “ Ajo kurrë nuk qau kur ishte me mua. Nuk e kam bërë kurrë. Unë nuk jam përdhunues”, tha Hyka.

Pas dënimit të shqiptarëve, gjyqtari Evnas tha se Hyka mund ta ketë përdhunuar para mbërritjes së shokëve të tij.

“Pasi të gjithë morën pjesë, ajo u detyrua të merrte kokainë dhe u inkurajua të pinte me qëllimin e vetëm për ta detyruar të përmbushte atë që ata synonin. U krijua një atmosferë frikësimi dhe frike. Ajo u godit me shuplakë dhe u detyrua të merrte kokainë. Kishte një shkallë poshtërimi”, deklaroi gjyqtari Evans.

Detektivi Hannah Latton, nga ekipi i policisë së Bedfordshire për përdhunime dhe vepra të rënda seksuale (RASSO) tha: “Ky ishte një rast i tmerrshëm ku viktima ishte në shënjestër efektivisht nga këta burra, të cilët e çuan atë në një pronë ku u mbajt kundër vullnetit të saj dhe në mënyrë të përsëritur. Viktima tregoi guxim të jashtëzakonshëm duke u përballur me sulmuesit e saj në gjykatë, edhe pse ata kishin guximin të mohonin veprat, duke e vënë atë në një kalvar të mëtejshëm për të rijetuar incidentin gjatë gjyqit. Dëshmia e saj ishte vendimtare për t’u siguruar që këta burra do të qëndrojnë pas hekurave për një kohë të konsiderueshme”./Opinion.al

Pas