Koreja e Jugut dhe Shtetet e Bashkuara të Amerikës iu përgjigjën lëshimit të tetë raketave nga Koreja e Veriut të dielën duke lëshuar tetë raketa të tjera në ujërat në brigjet lindore të gadishullit Korean të hënën në mëngjes.
Shtatë raketa u lëshuan nga Koreja e Jugut dhe një nga SHBA, thotë shefi i Shtabit të Përbashkët të Koresë së Jugut, i cili thekson se dy vendet i dërguan një mesazh Kim Jong-ut që dëshmon se “kemi aftësinë dhe vendosmërinë për të goditur menjëherë dhe me saktësi” ndaj asaj që cilësohet si një provokim që “godet paqen dhe stabilitetin jo vetëm në rajon, por të gjithë komunitetit ndërkombëtar”.
Koreja e Veriut lëshoi tetë raketa balistike me rreze të shkurtër veprimi nga pozicione të ndryshme të vendit në ujërat në lindje të gadishullit Korean të dielën.
Sipas CNN, shkëmbimi i raketave vjen ndërsa Koreja e Veriut intensifikon provokimet e saj në rajon, mes shqetësimeve të shtuara se Pheniani po përgatit një provë bërthamore.
Provokimet e Koresë së Veriut janë shtuar shumë gjatë këtij viti, duke përkuar me zgjedhjen e presidentit të ri të Koresë së Jugut, Yoon Suk Yeol, i cili ka një qasje të ndryshme nga presidenti para tij kundrejt Penianit. Ai ka ndryshuar politikën e Seulit zyrtar që më herët kishte promovuar dialogun mes palëve.
Nga të dyja anët, lëshimet e raketave shihen si një shfaqje e forcës dhe nuk synojnë objektiva specifike. Zakonisht raketat zbresin në det.
Qeveria japoneze deklaroi dje se ishte i paprecedentë fakti që raketa ra pranë zonës ekonomike ekskluzive të Japonisë, pra shumë pranë ujërave territoriale.
Kryeministri japonez Fumio Kishida reagoi ashpër dhe iu tha gazetarëve të dielën se lëshimi i raketave nga Koreja e Veriut ishte një shkelje e qartë e rezolutave të OKB-së./Opinion.al
