Deputetë të Partisë Demokratike, i kanë kërkuar sot Prokurorit të Përgjithshëm, Olsian Çela, hetimin e Fredi Kokoneshit, kryetarit të Bashkisë Divjakë, për shkak se, sipas PD-së ai rezulton i përfshirë dhe i dënuar për trafik të qënieve njerëzore në Itali.
Përmes një shkrese 15 deputetë të PD i kërkojnë organit të akuzës që të ndjek procedurat sipas ligjit të dekriminalizimit.
PD thotë se ekziston dyshimi i arsyeshëm se subjekti Fredi Kokoneshi, ndodhet në kushtet e ndalimit për të kandiduar dhe për t’u zgjedhur në një funksion të lartë publik.
“Kryetari i Bashkisë Divjakë ka kryer trafik të qënieve njerëzore dhe veprimtari të paligjshme të lidhura me prostitucionin në Milano dhe për pasojë, ai ka qenë i arrestuar nga Policia Italiane dhe i dënuar me burg” – thuhet në dokumentin e firmosur nga 15 deputetë.
