Partia Demokratike ka hedhur poshtë si të pavërteta akuzat e kryeministrit Rama ndaj kreut të saj Lulzim Basha në lidhje me UÇK-në.
Në një reagim zyrtar, Partia Demokratike thekson se Basha nuk ka marrë pjesë në asnjë proces ndaj UÇK-së dhe nënvizon se kjo gjë është konfirmuar nga ish- Kryeprokurori i EULEX.
“Në asnjë ditë të punës së tij në UNMIK, Lulzim Basha nuk ka marrë pjesë në asnjë proces ndaj anëtarëve apo drejtuesve të UÇK-së. Ky është një fakt i konfirmuar edhe nga ish- Kryeprokurori i EULEX, Williamson.”
Sipas tyre, këto akuza janë ngritur nga kryeministri Rama si një skenar shpifjesh në prag të zgjedhjeve dhe paralajmërojnë se do të ketë të tjera deri në 25 prill. PD deklaron gjithashtu se me anë të këtyre deklaratave dëmtohet interesi kombëtar si edhe imazhi i Kosovës dhe Shqipërisë.
“Sa herë është para humbjes së zgjedhjeve, Edi Rama zbaton të njëjtin skenar shpifjesh kundër Lulzim Bashës. E bëri atë në 2005-ën, në 2011-ën dhe po riciklon sërish skenarët e denja për Sigurimin e Shtetit. Të tillë skenarë imagjinarë kundër Lulzim Bashës do të dëgjoni pa ndërprerje deri në 25 Prill! Rama nuk ka asnjë alternativë dhe nuk ka me çfarë ta mbulojë tjetër dështimin e 8 viteve në pushtet. Përbuzeni Edi Ramën dhe mercenarët e tij!”, mbyll reagimin PD.
Reagimi i plotë i Partisë Demokratike
Partia Demokratike përbuz me neveri maskaradën e orkestruar nga Edi Rama dhe Top Channel kundër kreut të opozitës Lulzim Basha. Deklaratat e fabrikuara janë në shërbim të pushtetit të Edi Ramës dhe të pasurimit të paligjshëm të mercenarëve të tij, të fshehur pas incineratorëve.
Në asnjë ditë të punës së tij në UNMIK, Lulzim Basha nuk ka marrë pjesë në asnjë proces ndaj anëtarëve apo drejtuesve të UÇK-së. Ky është një fakt i konfirmuar edhe nga ish- Kryeprokurori i EULEX, Williamson.
Deklaratat e rreme të orkestruara nga Edi Rama nuk dëmtojnë aspak Lulzim Bashën. Ato shkojnë kundër interesit kombëtar, duke dëmtuar imazhin e Kosovës dhe Shqipërisë.
Sa herë është para humbjes së zgjedhjeve, Edi Rama zbaton të njëjtin skenar shpifjesh kundër Lulzim Bashës. E bëri atë në 2005-ën, në 2011-ën dhe po riciklon sërish skenaret e denja për Sigurimin e Shtetit.
Të tillë skenarë imagjinarë kundër Lulzim Bashës do të dëgjoni pa ndërprerje deri në 25 Prill! Rama nuk ka asnjë alternativë dhe nuk ka me çfarë ta mbulojë tjetër dështimin e 8 vitëve në pushtet. Përbuzeni Edi Ramën dhe mercenarët e tij! /Opinion.al
