PD ka propozuar ndryshime në Kodin Penal. Nënkryetari i PD, Oerd Bylykbashi ka deklaruar në Komisionin e Ligjeve se në kuadër të këtyre ndryshimeve të mos i nënshtrohet parashkrimit veprat penale dhe akuzat penale të korrupsionit, krimit të organizuar kundër Kryeministrit, ministrave dhe organeve të tjera të larta.
“Ne sugjerojmë që nuk i nënshtrohen parashkrimit veprat penale dhe akuzat penale të korrupsionit dhe krimit të organizuar kundër kryeministrit, zëvendëskryeministrit, ministrit, kryetarit të Kuvendit, kryetarit të bashkisë Tiranë, drejtues të institucioneve qendrore përgjegjëse për prokurimet publike dhe koncensionet si dhe ish-funksionarët e sipërpërmendur.”
Bylykbashi tha se parashkrimi nuk mund të bëhet mburojë për politikanët me poste të larta.
“Nuk mundet që parashkrimi të jetë mburoja e një nga kancerave më të fortë që kjo shoqëri po përjeton aktualisht.”
Për propozimin e Bylykbashit, kryetarja e Komisionit të Ligjeve, Klotilda Bushka tha se do të pritet një përgjigje e Këshillit të Ministrave për të vijuar më tej me procedurat e tjera ligjore./ Klan News
