Partia Demokratike ka akuzuar kandidatin e koalicionit të LSI dhe lëvizjes së ish-kryeministrit, Sali Berisha për Dibrën në zgjedhjet e 6 Marsit, Premtim Kryemadhin, se është bashkëshorti i prokurores që nuk hetoi dosjen 184 të vjedhjes së votave në Dibër.
Në një deklaratë për mediat, PD thotë se përzgjedhja e tij sqaron më së miri komunikimin privat të Flamur Nokës me Ulsi Manjën.
Sipas PD, nëse bashkëshortja e Kryemadhit do të hetonte dosjen 184, Ulsi Manja do ishte në burg. Po ashtu PD thekson se zgjedhja e tij si kandidat tregon skemën e bashkëpunimit Rama-Meta-Berisha.
“Kandidimi në Dibër i bashkëshortit të prokurores që mbrojti bandën e Edi Ramës, duke mos hetuar dosjen 184 të vjedhjes së zgjedhjeve në Dibër, është poshtërsi dhe tallje me dibranët dhe demokratët dibranë që masakrën zgjedhore e provuan të parët në 2016.
Premtim Kryemadhin nuk e lidh asgjë me demokratët, por përzgjedhja e tij sqaron më së miri komunikimin privat të Flamur Nokës me Ulsi Manjën. Nëse bashkëshortja e Kryemadhit do të hetonte dosjen 184, Ulsi Manja do ishte në burg.
Tashmë skema e bashkëpunimit Rama-Meta-Berisha është e qartë për çdo shqiptarë.
Po zgjodhe Sali Berishën e Ilir Metën mban Edi Ramën. Nëse zgjedh Edi Ramën mban Sali Berishën dhe Ilir Metën”, thuhet në njoftim./Opinion.al
