Mbledhja e sotme në KQZ ka shënuar sërish debatet teksa janë përplasur idetë mes përfaqësuesit të Partisë Demokratike në Komisionin Zgjedhor, Ivi Kaso dhe atij të PS Eridian Salianji.
Debati ka lindur për miratimin përfundimtarë të fletës së votimit, teksa PS e kërkon regjistrimin e kandidatëve me numër kurse PD me emër.
Kaso u shpreh pro idesë së Ilirjan Celibashit për modelin e fletës së votimit të jenë të shënuar emrat e kandidatëve për deputetë, duke kundërshtuar qëndrimin e përfaqësuesit socialist Eridian Salianji.
Sipas Kasos është çudi që ata që ishin “dashnorë” të listave të hapura, sot tentojnë që të fshehin kandidatët me numra. Kaso theksoi se duhet të prevalojë interesi i zgjedhësve që të kenë mundësi të zgjedhin kandidatin e parapëlqyer.
“Parimi është që zgjedhjet janë për zgjedhjet dhe pastaj për subjektet garuese. Për zgjedhjet e fundit ishte vetë ODIHR që hap raportin me këtë parim të rëndësishëm, që zgjedhjet ishin pa standarde për shkak se nuk ishin në funksion të interesit primar të zgjedhësve. Cili është interesi i zgjedhësi? Në nenin 98 përcakton përmbajtjen e fletës së votimit, dhe thotë që duhet të jetë e qartë, e kuptueshme, dhe zgjedhësi ta ketë lehtë orientimin për subjektin dhe kandidatit.
Zgjedhësi duhet të gjejë në fletë subjektin dhe kandidatin e parapëqyer. Si identifikohet kandidati? Njerëzit identifikohen me emra, jo me numra. Është çudi e madhe që subjektet që ishin dashnorë të listave të hapura, sot tentojnë t’i fshehin kandidatët me numra. Nuk mund të prevalojë interesi i administratës për të mbarojë punën më shpejt, në raport me interesin e zgjedhësve. Ndërhytë në Kodin Zgjedhor me pretekstin e listave të hapura, lista të hapura ka kur janë kandidatët”, tha Kaso.
Ndërkohë që Eridjan Saliajni u shpreh pro votimit të një flete votimi me numra, pasi sipas tij votimi me emra do ta ndërlikojë fletën dhe do të vonojë procesin.
“Nëse fleta do ketë emra do jetë emri i subjektit dhe kryetarit të partisë. Mendimi jonë është që kjo realizohet nga numri i partive. E vetmja mënyrë për të realizuar një votim, që të respektohet votimi në radhë të parë për subjektet, edhe për kandidatët, është votimi me numra. Kemi një fletë me 12 x 36 kandidatë, 500 emra. Kjo e ndërlikon fletën.
Kurse procesi i fletës me numra, fleta është shumë e thjeshtë, votohet subjekti dhe numri për kandidatin. Fushata bëhet me numra. Me vendimmarrjen që bëni sot, i mohoni të drejtën që vëzhguesit të jenë pjesë e procesit, sepse nuk mund të dallojnë për kë është votuar. Është shumë e rëndësishme për partitë që nuk kanë vëzhgues. Nëse votohet me këtë fletë do vonohet procesi i votimit, dhe do kishim radhë”, tha ai./Opinion.al
