Rajoni

Pasi u shfuqizua reciprociteti, SHBA kërkon nisjen e dialogut Kosovë-Serbi


Bëhu pjesë e Grupit Zyrtar të Opinion.al
>> KËTU <<
               Publikuar në : 20:32 - 06/06/20 |
el ida

Shtetet e Bashkuara të Amerikës thonë se mirëpresin vendimin e Qeverisë së Kosovës për të shfuqizuar masat e reciprocitetit ndaj Serbisë.

Në një deklaratë dhënë për Radion Evropa e Lirë, ambasada amerikane në Prishtinë thotë se tani SHBA-ja pret rifillimin e dialogut me Serbinë, që çon në njohje të plotë.

“Mirëpresim vendimin e qeverisë në heqjen e të gjitha masave të ndërmarra kundër Serbisë dhe tani presim që të rinisë dialogu sa më shpejtë që të jetë e mundur. Njohja e plotë është në interesin më të mirë të Kosovës dhe rajonit për të siguruar stabilitet dhe prosperitet ekonomik”, thuhet në deklaratën e ambasadës amerikane.

Më herët gjatë ditës, Qeveria e Kosovës votoi për shfuqizimin e masës së reciprocitetit ndaj Serbisë, masë kjo që u vendos nga qeveria e kaluar, më 1 prill.

Kryeministri i Kosovës, Avdullah Hoti tha se ka kërkuar nga partnerët ndërkombëtarë, që të kërkojnë nga Serbia, që edhe ajo të ndalë fushatën e çnjohjeve të pavarësisë së Kosovës, në mënyrë që të rinisë dialogu.

Dialogu ndërmjet Kosovës dhe Serbisë u ndërpre në fund të vitit 2018, pas vendosjes së taksës 100 për qind nga Qeveria e atëhershme e Kosovës, që udhëhiqej nga Ramush Haradinaj.

Më pas, qeveria e udhëhequr nga Albin Kurti hoqi taksën dhe vendosi reciprocitetin. Por, SHBA-ja dhe Bashkimi Evropian kërkuan që edhe reciprociteti të hiqej, në mënyrë që t’i jepej mundësi rinisjes së dialogut./Opinion.al

Pas