Kryesore

Osmani për BBC: Kam qenë vetë refugjate, i presim me zemërgjerësi afganët


Bëhu pjesë e Grupit Zyrtar të Opinion.al
>> KËTU <<
               Publikuar në : 10:47 - 19/08/21 |
Opi Nion

Presidentja e Kosovës, Vjosa Osmani, në një intervistë për BBC ka folur për situatën në Afganistan dhe gatishmërinë e Kosovës për të mirëpritur shtetasit afganë që u rrezikohet jeta.

Osmani ka thënë se Kosova me zemërgjerësi po pret refugjatët afganë, duke përmendur se edhe vetë ajo ka qenë refugjate dhe se e ndjen këtë situatë.

“Janë skena që ta thyejnë zemrën. Edhe unë kam qenë refugjate prandaj ne e ndjejmë këtë situatë çdo ditë”, tha Osmani.

Pas deklaratave se Kosova është përgatitur që para një muaji për ardhjen e afganëve, Osmani ka thënë se informacionet i kishin marrë më herët nga SHBA-ja dhe punonjësit e ushtrisë amerikane në Afganistan, por saktësisht nuk e kanë ditur që do të vinte kjo situatë.

“Por ne jemi të gatshëm dhe e treguam këtë gatishmëri pa hezitim. Numri i saktë është ende duke u diskutuar, por ne s’mund të jemi vendi që i themi jo refugjatëve, njerëzve në nevojë kur ne kemi hapësirën dhe sa më shumë hapësirë që kemi do ta shfrytëzojmë atë për t’i strehuar ata”.

“Me shumë gjasë ne do t’i kemi ata më shpejt se sa e presim. Në fillim menduam se ata do të vinin për nja dy javë dhe se mund të kemi më shumë kohë për t’u përgatitur. Brenda dy-tri ditëve do të merret vesh edhe për datën e saktë se kur do të vijnë ata”.

Osmani ka thënë se Kosova është e gatshme të ndihmojë edhe si shtet tranzit për refugjatët afganë, sepse, sipas saj, vetëm kur punohet bashkë do të arrihet të ndihmohen.

Osmani po ashtu u ka bërë thirrje të gjitha qeverive demokratike që t’ia zgjasin dorën afganëve njësoj siç ia zgjatën Kosovës.

“Është me rëndësi që së pari si njerëz e më pas si liderë të tregojmë lidership në këto situata të vështira. Duhet të kuptojmë se nëse nuk punojmë së bashku nuk do të jemi në gjendje të kemi sukses. Rasti i Kosovës tregon këtë. Vetëm kur SHBA-ja, Britania dhe anëtarët e NATO-s punuan së bashku arritën ta mposhtnin regjimin e Millosheviçit dhe të sillnin paqe jo vetëm në Kosovë por gjithë Ballkanin Perëndimor”, tha Osmani. “Unë isha refugjate vet. Nuk është se ata që të persekutojnë të pyesin nëse do të largohesh tash apo pas një viti. Asnjëri nuk largohet se do vetë, por e bën nga dëshpërimi. Për këtë arsye u bëjë thirrje të gjitha qeverive demokratike ta shtrijnë dorën njësoj siç kanë bërë për gjithë ne këtu në Kosovë. Nëse Kosova si shtet i vogël i Ballkanit mund të bëjë këtë atëherë gjitha shtetet mund ta bëjnë. Duhet të tregohet zemra e madhe”.

 

 

Pas