Aktualitet

Operacioni Forca e Ligjit, Prokuroria e Posaçme kthen dy dosjet e para


               Publikuar në : 18:08 - 12/02/20 |
Al Do

Prokuroria e Posaçme e SPAK ka marrë tashmë në shqyrtim dosjet e dorëzuara nga operacioni Forca e Ligjit lidhur me pasurinë dhe sekuestrimet e automjeteve të subjekteve të tij. Megjithatë mësohet se për dy dosjet e para që prokurorët kanë shqyrtuar i është kërkuar informacion shtesë OFL-së.

Dy sekuestrot e para që SPAK po heton janë ajo e kompleksit “Golden” në pronësi të Altin Hajrit që është në kërkim për rrëmbimin dhe vrasjen e Jan Prengës dhe bllokimi i makinës së blinduar të Saimir Taullaut.

Sipas ligjit, masat e sekuestros emergjente të vendosura nga OFL duhet ti kalojnë SPAK brenda 48 orëve dhe ky i fundit duhet ta çojë në gjykatë brenda 15 ditëve. Në këtë rast mesa duket ky afat do të shtyhet duke qenë se Prokuroria e Posaçme ka kërkuar informacion shtesë, plotësues mbi veprimet e mëtejshme nga policia. Ky veprim ishte i pritshëm duke qenë se krahu hetues i Prokurorisë së SPAK është BKH-ja e cila nuk është ngritur ende.

OFL i ka dorëzuar sot kërkesën për deklarim pasurie Dritan Dajtit dhe Xhevdet Toplinit ndërsa dje formulari iu dërgua Emiliano Shullazit dhe Gjergj Cukalit.

LEXO EDHE – OFL i kërkon deklarim pasurie, Dritan Dajtit dhe Xhevdet Toplinit

Në SPAK deri tani janë dorëzuar vetëdeklarimet e Lulzim Berishës, Ardian Çapja, Saimir Taullaut, Dashamir Gjokës, Emiljano Hysenaj , Edlir Hysenaj, Plarent Dervishi, Suel Çela dhe Arben Isufajt i njohur si Ben Qimja.

OFL ka njoftuar se në rrjetën e tij është dhe Bardhok Planaj dhe Albert Lame Kochsiek, të cilëve i është këruar deklarimi i pasurisë.

Operacioni ka kryer bllokimin e pasurisë së disa subjekteve. Në Shkodër u sekuestruan vila, banesa ,automjete si dhe sipërfaqe tokash dhe trojesh të 7 anëtarëve të grupit Dukagjini, të dyshuar për rrëmbimin e biznesmenit nga Rrësheni. Një ditë më parë OFL ka bllokuar 6 makina të blinduara të cilat rezultonin në pronësi të Xhevdet Troplinit, Bledin Doçi, Ervis Doçit, Ilir Gjyzelit. Ndërsa më herët OFL ka sekuestruar automjetet e Dashamir Gjokës, Durim Bamit, Saimir Taullait, Landi Muharremit. /Opinion.al

Pas