Altin Avdyli, i njohur ndryshe si “Niçja” ka kërkuar ndryshimin e masës së sigurisë me argumentin se vuan nga probleme shëndetësore dhe duke marë shkak edhe nga situata e COVID-19 ka paraqitur kërkesën për të lënë qelinë e paraburgimit.
Avokatët e Avdylit paraqitën kërkesën për ndryshimin e masës nga “arrest në burg” në “arrest shtëpie” në Gjykatën e Apelit por ajo u rrëzua.
“Niçja” u bë i njohur pas daljes së përgjimeve të gazetës ‘Bild’ ku ai komunikonte në telefon me ish-kreun e Bashkisë së Durrësit, Vangjush Dako. Opozita e akuzon atë si bashkëpunëtor në krim elektoral në zgjedhjet e vitit 2017. Kjo solli edhe ndarjen e dosjes ku ai po hetohej fillimisht e njohur si dosja 339.
Altin Avdyli është marrë i pandehur bashkë me 19 persona për trafikimin e gati 200 kg lëndë narkotike heroinë dhe një sasie të konsiderueshme hashashi. Hetimet janë mbyllur në janar të këtij viti dhe tashmë pritet gjykimi.
Akuzat për anëtarët e këtij grupi janë “Trafikim të lëndëve narkotike” në forma të posaçme, “Grup i strukturuar kriminal”, ”Pastrim i produkteve të veprës penale” dhe “Kryerja e veprave penale në formën e Grupit të strukturuar kriminale”. /Opinion.al
