Zv/ndihmës Sekretari i Shtetit për Evropën Matthew Palmer tha disa gjëra që nuk ishin përmendur më parë nga zyrtarët amerikanë në lidhje me situatën në Shqipëri.
Çështja e nxehtë e përgjimeve ishte një nga ato tema për të cilën shpesh herë është kërkuar një opinion, kryesisht nga amerikanët, të cilët kishin ndenjur të heshtur deri tani. Pyetjes se çfarë komenti kishte ai për përgjimet e publikuara Palmer ju përgjigj prerë siç ka bërë edhe në lidhje me çështje të tjera, ne do mbështesim një hetim serioz për këto akuza serioze. Ai tha se me hetimin e kësaj çështjeje duhet të merren autoritetet shqiptare por la të kuptojë se kjo histori duhet të dalë në një përfundim.
“Këto janë akuza serioze që duhet të hetohen. Ne do të mbështesim një hetim nga institucionet dhe autoritetet shqiptare, një hetim që është profesional, transparent, që të çon drejt një përfundimi. Këto janë akuza shumë serioze, që kërkojnë hetime serioze”
Tema e dytë me interes për kontekstin aktual është se çfarë do të ndodhë pas 30 qershorit. Përpos të qënit tepër i qartë se SHBA janë në mbështetje të plotë të kësaj date, Palmer nuk la pa përmendur një gjë shumë të rëndësishme, anën proceduriale dhe ligjore të cilën e vendos vetëm Gjykata Kushtetuese. Ai foli për herë të parë për një skenar përsëritjeje zgjedhjesh në rast se Gjykata Kushtetuese e vendos këtë gjë, madje ai shtoi se kjo është vetëm punë e gjykatës dhe e asnjë politikani tjetër.
“Pas zgjedhjeve, do të ketë mundësi që të krijohet Gjykata Kushtetuese, është plotësisht e mundur që Gjykata të vendosë që zgjedhjet duhen përsëritur, por kjo i takon Gjykatës ta vendosë dhe jo politikanëve të veçantë” tha Palmer.
Pra konflikti i deri tanishëm me bazë retorike për datën dhe legjitimitetin e zgjedhjeve mes kryeministrit, opozitës dhe presidentit nuk ka rëndësi për SHBA pasi për këtë gjë mund të shprehet vetëm Gjykata Kushtetuese. Mungesa e saj mesa duket nuk e shqetësonte shumë zyrtarin amerikan pasi ai shprehej i bindur se ajo do të krijohej pas zgjedhjeve.
Një gjë tjetër që sipas tij do të ndodhë pas zgjedhjeve është se opozita dhe qeveria do të ulen në dialog.
“Janë disa gjëra që ne shpresojmë të ndodhin pas një korrikut. E para është dialogu mes qeverisë dhe udhëheqësve të partive të opozitës për reformën elektorale”
Ulja në dialog për Palmer duhet të kryhet për arsye krejt instrumentale duke parë dhe arsyen që ai konsideron si të parën, reformën elektorale. Kjo reformë është mbështetur fuqishëm nga SHBA pasi sipas tyre do të garantojë një proces demokratik të rregullt në zgjedhjet e ardhshme.
Sa i përket konfliktit nga ana politike ai dha një mesazh të qartë për aktorët vendas por dhe të huaj në Shqipëri. Askush përveç shqiptarëve nuk ka tagër për të ndërhyrë në zgjidhjen e problemeve politike. Pra roli i arbitrit nga përfaqësitë ndërkombëtare nuk duhet mbi vlerësuar por duhet që forcat politike dhe qytetarët ta zgjidhin vetë krizën e tyre.
“Mosmarrëveshjet politike duhet të zgjidhen jo nga aktorët ndërkombëtarë, apo nga forca të jashtme që shkojnë atje për të zgjidhur mosmarrëveshjet apo luajtur rolin e arbitrit” tha Palmer në fund të intervistës së tij. /Opinion.al
