Kryesore

Nga Blendi Fevziu- Pse ne duhet t’i presim afganët e kërcënuar


Bëhu pjesë e Grupit Zyrtar të Opinion.al
>> KËTU <<
               Publikuar në : 17:14 - 15/08/21 |
Opi Nion

– Nga Blendi Fevziu-

Duke ndjekur lajmet e orës 15:30 ngela tejet i befasuar nga debati lidhur me ardhjen në Shqipëri të një kontigjenti afganësh që kërcënohen nga regjimi i talebanëve që sot hyri në Kabul. U befasova akoma më shumë nga fakti që klasa politike shqiptare justifikohet me idenë se këtë e ka kërkuar NATO dhe SHBA; apo qe rrjetet sociale po mbushen me foto denigruese te talebanëve me kallashnikovë në dorë.

Personalisht, unë besoj se Shqipëria e ka detyrim jo nga NATO, jo nga SHBA, por nga historia e saj mikpritjen e afganëve apo çdo kombësie tjetër të kërcënuar. Me emigracionin ne jemi një komb në borxh dhe kemi pjesën tonë të borxhit për të shlyer.

Ne duhet t’i presim afganët e kërcënuar sepse duke vuajtur nën një regjim ndër më kriminalët në botë, siç ishte ai komunist, e dimë shumë mirë se cila është e ardhmja e tyre nëse mbeten aty. Ata janë elita e sotme e Kabulit. Ne e kemi më të qartë se kushdo fundin e atyre pak njerëzve të shkolluar e të emancipuar, që ngjan me fatin e shumë intelektualeve në vitin 1945 e deri në 1990 në Shqipëri.

E dyta, perëndimi ka strehur me vite emigrantë politikë shqiptarë dhe ky është një detyrim i gjithë vendeve demokratike të civilizuara.

Ne kemi ende të freskët eksodet e vitit 1990 apo 1991, kur bota na mirëpriti me gjithë problemet që solli ai eksod. Ne kemi qenë më shumë se kushdo popull ne Europe viktima të politikave anti-emigrante. Ndaj të përkrahësh sot këto ide në Shqipëri do të thotë të justifikosh racizmin dhe përbuzjen qe kanë vuajtur në 3 dekada emigrantët shqiptarë.

Së fundmi ne jemi pjesë e nje bote të integruar në të cilën, jep dhe merr. Ideja që vetëm të marrim pa dhene kurrë është me shumë se neveritëse.

Su fundmi, ç’do kishte ndodhur nëse Ne, Maqedonia dhe perëndimi s’do kishte hapur dyert për emigrantët shqiptarë të Kosovës, por do t’i kishte lënë në doren e Millosheviçit.

Ndaj, për mua e këdo qe mendon si unë, afganet janë të mirëpritur, tranzit, ose per t’u bërë shtetas të këtij vendi siç shumë shqiptarë janë bërë shtetas të vendeve të tjera të botës.

Për të gjithë ata që tallen me fotografitë e emigrantëve, po ju sjell në kujtese më këto foto eksodin tani. Secili prej tyre është njëri nga ne!

 

 

Pas