TIRANË- Komisioni për Reformën në Drejtësi merr në shqyrtim sot propozimet e mazhorancës për ndryshimet kushtetuese. PD është shprehur edhe më herët kundër tyre dhe për këtë u është drejtuar edhe ndërkombëtarëve.
Paketa për reformën në drejtësi prejk edhe kompetencat e Presidentit. Mazhoranca me ndryshimet kushtetuese kërkon ta heq presindetin nga KLD. PD është kundër. Në propozimet e saj mazhoranca kërkon një KLD pa President dhe Ministër Drejtësie dhe shkrirje të Konferencës së Gjyqësorit, kurse në platformën e opozitës nuk ka ndalim për Presidentin por vetëm për ministrin e Drejtësisë.
E drejta në emërimin e Prokurorit të Përgjithshëm është një tjetër pikë ku palët duken larg njëra-tjetrës. Shumica thotë se Prokurori i Përgjithëm emërohet nga 3/5 e deputetëve me propozim të Këshillit të Lartë të Prokurorisë dhe mbi opinionin e këshillit për emërimet në drejtësi për një periudhë 9-vjeçare pa të drejtë riemërimi, ndërsa në platformën e opozitës Prokurori i Përgjithshëm duhet të emërohet me proces ndërveprues të Këshillit të Prokurorisë, Presidentit të Republikës dhe Kuvendit.
Demokratët kërkojnë që të gjithë anëtarët e insitucioneve kushtetuese deri tek prokurori i përgjithshëm apo kreu i ILDKP të zgjidhen me shumicë kushtetuese prej 93 votash, ndërkohë që në strategjinë e shumicës vetëm anëtarët e Gjykatës Kushtetuese kërkohet të zgjidhen me shumicë të cilësuar. Byroja e hetimit është një tjetër pikë, ku palët ndahen. Mazhoranca këmbëngul që ajo të jetë në varësi të qeverisë dhe anëtarët e saj të jenë me status prokurori. Për opozitën është antikushtetues, dhe se ky organ duhet të jetë vetëm në përgjegjsinë e Prokurorisë, bazuar në vendimin e Gjykatës Kushtetuese.
Drafti me ndryshimet kushtetuese të shumicës mësohet se pati të shqyrtohen ditën e sotme në komision do t’i dërgohet për mendim Komisionit të Venecias.
Burime të TV Klan në PD thonë se deputetët e djathtë në komisonin e reformës në drejtësi nuk janë njoftuar se pjesë e këtyre diskutimeve do të jenë edhe 300 amendamentet dhe ndryshimet kushtetuese të bëra nga opozoita, për të cilat demokratët i janë drejtur me një shkresë misioneve të ambasadave.
