Rajoni

Ministri i Jashtëm grek mesazh Tiranës: Të zbardhet çështja Katsifas


               Publikuar në : 19:14 - 21/08/19 |
Al Do

Ministri i Jashtëm i Greqisë, Nikos Dendias i është drejtuar me një mesazh autoriteteve shqiptare për të përfunduar sa më shpejtë hetimet për ngjarjen ku humbi jetën Konstantinos Katsifas.

Lajmin e ka bërë të ditur vetë Dendias në një interpelancë në parlament e cila është publikuar sot.

“Athina i ka bërë të qartë palës shqiptare se hetimet përkatëse duhet të përfundojnë menjëherë dhe të publikohet sa më shpejt të jetë e mundur, pa vonesa të mëtejshme, raporti i hollësishëm që do të hedhë dritë mbi të gjitha aspektet e çështjes dhe kjo do të çojë në dhënien e drejtësisë, por dhe sigurisë për minoritetin kombëtar grek”, thekson kryediplomati grek.

Dendias ka kritikuar vonesën në hetime, e ardhur si pasojë e ndryshimit të prokurorit të çështjes dhe kërkon që të publikohet sa më shpejtë Raporti Zyrtar nga Prokuroria e Krimeve të Rënda. Ai nënvizoi faktin se ministria që ai drejton po e trajton me seriozitet këtë çështje edhe në planin ndërkombëtar.

“Mbrojtja e të drejtave të Minoritetit Kombëtar Grek, ka të bëjë jo vetëm me marrëdhëniet bilaterale Greko-Shqiptare, por edhe me perspektiven evropiane të Tiranës, pasi përbën  një nga 5 prioritetet kryesore që Shqipëria duhet të përmbushë në mënyrë që të marre ne tetor datën për hapjen e negociatave për integrim në BE” përfundoi Dendias përgjigjen e tij. /Opinion.al

Pas