Ministria për Europën dhe Punët e Jashtme ka dyfishuar numrin e shërbimeve konsullore krahasuar me një vit më parë sipas ministrit në detyrë Gent Cakaj.
Me anë të një postimi në Facebook, Cakaj krahason periudhën 1 janar – 21 gusht 2018, kur ministria drejtohej nga Ditmir Bushati me të njëjtën periudhë të këtij viti.
“Përgjatë periudhës 1 janar – 21 gusht 2018 në Ministrinë për Evropën dhe Punët e Jashtme janë kryer 246 186 shërbime konsullore. Kjo shifër është dyfishuar për të njëjtën periudhë kohore në vitin 2019 duke arritur numrin 442 054 të shërbimeve të realizuara në MEPJ” shkruan ministri në detyrë Gent Cakaj.
Ai e konsideron këtë një shifër rekord dhe nënvizon se rritje “substanciale” ka patur edhe në shërbimin konsullor të përfaqësive të Shqipërisë në botë ku nga 51 635 shërbime për këtë periudhë vitin e kaluar, këtë vit janë dhënë 89 691 shërbime.
“MEPJ ka ende shumë punë për të bërë për t’iu shërbyer denjësisht qytetarëve shqiptarë nëpër botë! Puna aktuale pasqyron vetëm mundësitë reale të Ministrisë por assesi vullnetin për të shërbyer më shumë e zhvilluar tutje një performancë edhe më cilësore!” mbyll Cakaj postimin e tij.
Ditmir Bushati u zëvendësua në postin e Ministrit të Jashtëm në dhjetor të vitit të shkuar nga Gent Cakaj por ky i fundit nuk u dekretua nga presidenti Meta. Në këto rrethana deryrën e kryediplomatit e mori kryeministri Rama i cili emëroi zëvendës ministër Gent Cakajn i cili prej atëherë ka shërbyer si ministër në detyrë duke përfaqësuar Shqipërinë në ato takime ndërkombëtare që i lejon statusi i zëvendësit. /Opinion.al
