Presidenti i Republikës, Ilir Meta ka përshëndetur sot Kongresin e 7-të të Bashkimit të Sindikatave të Pavarura të Shqipërisë, të mbajtur në Tiranë.
Në mesazhin e tij Meta ka shprehur mbështetjen e tij për sindikatave dhe ka theksuar se roli i tyre duhet të vijë në rritje.
“Koha kërkon prej jush dhe gjithë shoqërisë civile krijimin e një sjellje të re, e një raporti të ri me pushtetin në dobi të punonjësve, e një reagimi të fuqishëm ndaj politikave sunduese si dhe një marrëdhënieve të re shoqërore në tregun e punës.
Betejat e mëdha kërkojnë edhe solidaritet të fuqishëm” shkruan Presidenti.
Gjatë konferencës ka qenë e pranishme edhe Sekretarja e Përgjithshme të Konfederatës Botërore të Sindikatave, Znj. Sharran Burrow, prezencën e së cilës Meta e quan inkurajuese “në luftën” e sindikatave “kundër oligarkëve që kanë ngulur kthetrat në ekonominë e vendit”.
Në të njëjtën frymë të deklaratave të kohëve të fundit Meta ka vënë në dukje dobësimin e sistemit demokratike në vend dhe ka nënvizuar gjendjen e rëndë socio-ekonomike.
“Vlerat e demokracisë po shemben para syve tanë. Në Shqipëri po instalohet një politikë dhe ekonomi larg interesave të qytetarëve dhe jashtë kontrollit të tyre. Mungojnë zgjedhjet e lira dhe të ndershme, shtypen sindikatat dhe zëri i tyre.
Kapen dhe bllokohen organizatat e shoqërisë civile. Shtypi e media janë gjerësisht nën thundrën e censurës dhe në shërbim të shtetit propagandistik. Që të dalim nga kjo situatë duhet të pranojmë sa poshtë kemi rënë! Në atdheun tone të dashur mjerimi ka pllakosur vendin. Investimet po shterojnë dita ditës. Borxhi publik po paralizon ekonominë. PPP –te po vrasin të sotmen, por edhe të nesërmen e financave publike.” shkruan Meta.
Meta paralajmëroi se më 22 nëntor ai do të paraqesë një platformë për nxjerrjen e vendit nga kriza. Për vite me radhë roli i sindikatave në Shqipëri ka qenë relativisht i dobët në mënyrë që ato të funksionojë si grup i fuqishëm interesi. Në reagimin e tij të sotëm shihet një qasje e re e Presdentit Meta ndaj rolit të sindikatave por vëmendje të veçantë tërheq edhe thirrja e tij për një model të ri politik.
“Në këtë situatë ne duhet të mendojmë të gjithë së bashku për një frymë dhe model të ri politik të vendit. Për një shoqëri më sociale, të drejtë e të barabartë, për një rishpërndarje më të drejtë të të mirave materiale, si dhe për iniciativa frutdhënëse në biznese e punësim” ka deklaruar Meta/ Opinion.al
