Kreu i Partisë së Lirisë, Ilir Meta në një konferencë për mediat ditën e sotme i ka bërë thirrje qeverisë shqiptare të tërhiqet nga projektligji për amnistinë fiskale.
Meta akuzoi qeverinë duke thënë se ky projektligj është projektuar e urdhëruar nga bota e krimit.
“Qeveria të tërhiqet menjëherë nga projektligji për amnistinë fiskale që është projektuar e urdhëruar nga bota e krimit për të përfituar mundësinë që të ardhurat ndër vite të përfituara nga akte të renda korruptive brenda vendit të pushtojnë ekonominë vendase dhe tregun financiar, për të kriminalizuar përfundimisht ekonominë, shoqërinë dhe gjithë institucionet. Kështu do të goditej në këtë mënyrë e dëmtohej në mënyrë fatale biznesi i ndershëm që do falimentonte dhe iniciativa e lirë vendase. Do dekurajoheshin dhe largoheshin nga vendi dhe ata pak investitorë të huaj seriozë që kanë mbetur. Do kriminalizohej gjithë ekonomia e shoqëria duke e ekspozuar vendin si destinacion që favorizon veprimtarinë e grupeve kriminale mafioze ndërkombëtare. Do minohej besimi i qytetarëve tek institucionet, barazia para ligjit e do nxitej ekonomia kriminale e informale. Do krijiohej besimi se cdo veprimtaari kriminale do amnistohej gjithmonë në të ardhmen. Do sillte rritjen e kriminalitetit dhe qytetarë në burgje. Falë kësaj qeverie e mungesës se vullnetit për të luftuar krimin Shqiperia është kthyer në bazë operacionale për aktivitetet kriminale. Në emër të Partisë së Lirisë bëjmë thirrje të hiqet urgjentisht dorë nga kjo nismë. Qeveria shqiptare ka për detyrë të zhvillojë vendin nëpërmjet punës së ndershme dhe jo të shpallë krimin si motor të zhvillimit të vendit.”-tha Meta.
